اقوام متحدہ۔ 03 اکتوبر (اے پی پی) پاکستان جموں و کشمیر آ بھارت نا کوزہ ءِ پوسکن آ دور انا نوآبادیاتی نظام نا بدترین درشانی گوندسا اقوام متحدہ غان خواست کرینے کہ او سلامتی کونسل نا قرارداد و کشمیری الس نا است خواہی تا رداٹ بھلو مد اسے آن ایسر نا چاری کشمیر نا جھیڑہ نا پرامن ایسری آ زور شاغے۔ اقوام متحدہ ٹی پاکستان نا آخبتی مندوب منیر اکرم جنرل اسمبلی نا اسپیشل پولیٹیکل اینڈ اورڈی کالونائزیشن (چارمیکو) کمیٹی ءِ پارے کہ 1946 آن پد آن 80 مسکوہی کالونیک آجوئی دوئی کرینو ولے داسہ ہم ہندن ءُ بندغ ساڑی ارے ہرافتے حق خودارادیت آن محروم تخنگانے ہرافتے ٹی غٹ آن نمان وڑاٹ بھارت نا غیرکانودی کوزہ ٹی جموں وکشمیر و فلسطین نا مخلوق اوار ءُ۔ اوپارے کہ کشمیری الس نا حق خودارادیت ءِ اقوام متحدہ نا سلامتی کونسل نا قرارداد 47 و اونا پد انا چندی قراردادآتیٹی پیدوار وڑاٹ امنا کننگانے، ہرافتے ٹی پاننگاکہ ریاست جموں و کشمیر نا آخبت نا گڈیکو فیصلہ ءِ اقوام متحدہ نا سرپرستی ٹی آجو و شفاف استصواب رائے نا کمک اٹ اونا الس کیک ۔ اوپارے کہ دا قراردادآتے بھارت و پاکستان ہڑتوم آک امنا کریر و اقوام متحدہ نا چارٹر نا آرٹیکل 25 نا رداٹ ہڑتوم آ فریق دا قراردادآتیا عملدرآمد ءِ ضم کننگ کن اسہ کنڈی و غیرکانودی گام گیج کرینو ہرادے بھارتی راہشونک گڈیکو ایسرگوندانو۔ منیر اکرم پارے کہ سلامتی کونسل نا قرارداد 122(1957) نا رداٹ ریاست جموں وکشمیر نا آخبت و مچ آریاست یا اونا بشخ اسے نا تعلقداری نا تعین ءِ کننگ کن اسہ کنڈی گام گیج ریاست نا گڈیکو ایسر ی مفک۔
