اسلام آباد۔ 02 اکتوبر (اے پی پی) نگران وزیراعظم انوارالحق کاکڑ ملک انا مسہ ضلع غاتیٹی پولیو دین انا ساڑی گری آ گڑتی نا درشانی ءِ کرسا پارینے کہ عالم دین، استاد ، لمہ و باوہ غاتون اوار غٹ اسٹیک ہولڈر آتے انسداد پولیو نا آگہی مہم اٹ اوار کننگے۔ وزیراعظم آفس نا میڈیا ونگ آن جاری بیان نا رداٹ دوشنبےنادے آنگران وزیراعظم انوارالحق کاکڑ نا کماشی ٹی انسداد پولیو کن نیشنل ٹاسک فورس انا دیوان اس اڈہلک۔ وزیراعظم دیوان آن تران کرسا پارے کہ پولیو نا ملک آن پورو چٹفنگ کن راج انا ہرتپہءِ دا قومی فرض اٹی تینا کڑد ءِ ادا کروئی مریک۔ ملک انا چناتا رکھ و جان جوڑآخبت کن ہراسٹ ءِ دا مقدس مشن نا بشخ جوڑمروئی مریک۔ اوپارت کرے کہ عالم دین، استاد، لمہ و باوہ و غٹ اسٹیک ہولڈر آتے انسداد پولیو نا آگہی مہم نا بشخ جوڑ کننگے۔ وزیراعظم کانود نافذ کروک آ ادارہ غاتے پارت کرے کہ انسداد پولیو مہم اٹی پولیوورکرآتا سیکورٹی ءِ پک کننگے۔ اوپارے کہ ملک اٹی پولیو نا کیس آتیٹی نمان کمتی بسنے ولے ملک آن دا موذی مرض ءِ ماس آن چٹفنگ اسکان نن تینا پبی کوشست آتے برجاتخنہ، قوم اکن غٹ آن بھلا کوشی نادے ہمومریک ہراتم ملک انا چناچنا دا خطرناک مرض آن پورو وڑاٹ رکھ مریک، دا مسلمہ حقیقت ءِ کہ غٹ عالم دینک بشمول امام کعبہ ہم پولیو آن بچفنگ نا پڑی تے اسُل رکھ و چناتا معذوری آن پاک آخبت کن بے کچ المی گوندانے۔ وزیراعظم ملک انا مسہ ضلع غاتیٹی پولیو دین انا ساڑی گری آ گڑتی نا درشانی ءِ کرسا پارت کرے کہ ہرا ضلع غاتیٹی پولیو دین نا ساڑی گری نا حوال ارے ہموڑے خصوصی انسداد پولیو مہم اس چلیفنگے۔ اوپارے کہ پولیو دین انا برخلاف جنگ ننا آخبت نا بقانا جنگ ءِ ہرادے ننے ہر حال اٹ کٹوئی مریک۔ وزیراعظم انسداد پولیو نا قومی پروگرام اٹی زیات آن زیات بشخ ہلنگ و اہم کمکاری آ غٹ جہانی شریدارآتا منت واری ءِہرفے۔ دیوان ءِ پاننگاکہ 2022اٹی ملک اٹی رپورٹ مروک آ 20 کیس آتا بہ نسبت برجاسال داسکان بیرہ اِرا کیس رپورٹ مسنو ہرافتا بھلا سوب قومی کہول آ انسداد پولیو مہم آتا تسلسل و حکومتی کہول آ کوشست آک ءُ۔ وزیراعظم وزارت جان جوڑی، نیشنل ٹاسک فورس، صوبائی حکومت و انتظامیہ و کانود نافذ کروک آ ادارہ غاتا انسداد پولیو کن کوشست آتا ستا ءِ کرے۔ دیوان ءِ صوبائی وزیراعلیٰ و چیف سیکرٹریک پولیو نا صوبہ غاتیٹی ساڑی حالیت و حکومتی کوشست آتیان معلومدار کریر۔ دیوان ءِ داہم پاننگاکہ سندھ، پنجاب، و بلوچستان ، بشمول گلگت بلتستان و آزاد جموں و کشمیر، پولیو آن اسُل پاک ءِ، وخت اس کہ برجاسال خیبرپختونخوا ٹی داتم اسکان بیرہ بنوں ٹی اِرا کیس آتا پیدواری مسنے۔ دیوان اٹ نگران بنجائی وزیر جان جوڑی ڈاکٹر ندیم جان، نیشنل ٹاسک فورس انا بڑزکو کمامدار، ہر چار آ صوبہ غاتا نگران وزیراعلاک، چیف سیکرٹری ، کانود نافذ کروک آ ادارہ غاتا نمائندہ و تعلقدار بڑزکو کمامدارآک بشخ ہلکر۔
