اسلام آباد۔ 02 اکتوبر (اے پی پی ) نگران وزیراعظم انوارالحق کاکڑ پارینے کہ پولیو نا چٹفنگ ننا دینی، اخلاقی و قومی فرض ءِ، دا موذی مرض آن ننے تینا برو ک آ چین تے بچفوئی ءِ، ملک ءِ پولیو آن پاک کننگ نا عزم اتون انسداد پولیو نا جنگ ءِ کٹنہ، پولیو ورکرآک ننا اصل ہیروک ءُ۔ داخیال آتا درشانی ءِ او دوشنبے نادے آ داڑے ملک گیر انسداد پولیو مہم نا بناءِ کننگ نا دود آن تران کرسا کرے۔ نگران وزیراعظم پارے کہ او چناتے پولیو آن بچفنگ نا پڑی کنفسا 5 دے ئی قومی انسداد پولیو مہم نا بناءِ کرینے۔ دا مہم اٹی 5 سال اسکان نا وئی نا 4 کروڑ 40 لکھ آن زیات چناتے انسداد پولیو نا پڑی کنفنگک۔ داقومی مہم اٹ 3 نیم لکھ پولیو ورکربشخ ہلنگ اٹی ءُ ہرا ننا اصل ہیروک ءُ و فرنٹ لائن ورکرآک ءُ۔ حکومت اوفتے تون ہم کوپہ سلسا پولیو دین انا چٹفنگ کن جنگ ءِ تینا جہانی شریدار آتون اوار کننگ ءِ و دا موذی مرض آن ننے تینا بروک آ چین تے بچفوئی ءِ۔ دا ننا غٹ انا دینی، اخلاقی و قومی فرض ءِ۔ وزیراعظم غٹ مکتبہ فکر انا عالم دین تیان خواست کرے کہ او بروک آ چین تے دا مرض آن بچفنگ نا مہم اٹ زیات آن زیات ببشخ ہلیر و اللہ تعالیٰ و اونا رسول صلی اللہ علیہ و آلہ وسلم نا خوشنودی و تینا آخرت ءِ جوڑ کننگ کن حکومت تون کمک کیر۔ اوپارے کہ دا مہم ءِ نن ہندن ءُ مشن اس تکسا پورو کروئی ءِ، ہراڑان اقوام عالم و امت مسلمہ نا ہندن ءُ عکس اس پیش مرے کہ ہراٹی تینا چناتا رکھ اکن پبی عزم انا درشانی مرے و ہندا عزم اتون انسداد پولیو نا جنگ ءِ نن ضرور کٹنہ۔
