اسلام آباد۔ 02 اکتوبر (اے پی پی) نگران بنجائی وزیر حوالکاری و شینکاری مرتضیٰ سولنگی تون نگران وزیرداخلہ سرفراز بگٹی اوڑدہی کرینے۔ اوڑدہی ٹی امن وا یمنی نا حالیت آتون اوار تین پہ تینی است خواہی نا امور تیا گپ وتران کننگا۔ دوشنبے نادے آ داڑے وزارت حوالکاری آ بننگ آ نگران بنجائی وزیر حوالکاری نگران وزیرداخلہ سرفراز بگٹی ءِ بخیر کرے۔ ہڑتوم آ وزیرآک ساڑی آ بمب دھماکہ غاتیٹی نہادی جانی نسخان تیا است ہسونی نا درشانی ءِ کرسا پارے کہ دہشت گرد و اوفتا کمکارآتیکن پاکستان اٹ ہچ ءُ جاگہ اس اف۔ اوڑدہی ٹی گچین کاری تا بابت نگران حکومت نا الیکشن کمیشن تون کمکاری نا بابت ہم گپ وتران مس۔ نگران بنجائی وزیر آک پاریر کہ ملک اٹی لس گچین کاری تا اڈتننگ نا آئینی زمواری ٹی الیکشن کمیشن نا ہر ممکن کمک ءِ کینہ۔ داوخت آ نگران بنجائی وزیر حوالکاری پارے کہ امن وایمنی حکومت نا زمواری ءِ، ننا فرض ملک اٹی ساف، شفاف وبے کنڈ ہلوک گچین کاری کرفنگ اٹ الیکشن کمیشن نا کمک ءِ کننگ ءِ۔
