اسلام آباد۔ 02 اکتوبر (اے پی پی) نگران بنجائی وزیر حوالکاری وشینکاری مرتضیٰ سولنگی ملکی ویل آتیا اواری اٹ تولسا ہیت کننگ نا گرج آ زور شاغسا پارینے کہ ملک ءِ بھسکاری آخا شونداری نا کنڈا دروئی مریک، ہراقومک تاریخ آن ہیل کپسہ او نسخان ہرفرہ۔ اودوشنبے نادے آ داڑے پنی آ مصنف ڈاکٹر فاروق عادل نا کتاب ’’ہم نے جو بھلادیا: تاریخ پاکستان کے گمشدہ اوراق‘‘ نا رونمائی دود آن بحیثیت مہمان خاص تران کریکہ۔ دود انا کماشی ءِ سینیٹر عرفان صدیقی کرے۔ نگران بنجائی وزیر حوالکاری کتاب نا رونمائی دود آ ڈاکٹر فاروق عادل ءِ مبارکبادی پیش کرے۔ اوپارے کہ ڈاکٹر فاروق عادل تینا کتاب اٹی ملکی تاریخ نا پلو آتے مون آ تخا۔ داکتاب اٹی ننا گورننس ، جمہوریت نا ارتقائی، ریاست نا تعلقداری و خارجہ پالیسی تون اوار بھاز انگا ویل آتا ذکر ءِ۔ اوپارے کہ ننے تاریخ آن ہیل کننگ نا گرج ءِ۔ اوپارے کہ ساڑی آ دور اٹی زموارانہ صحافت نا تعین بے کچ المی ءِ، ڈاکٹر فاروق عادل تینا کتاب نا کمک اٹ اسہ ہندن ءُ زیبا و خوشگوار وخت اس فراوان کرینے ہراڑے چندی النوع بندغ اسہ جاگہ غا تولسا تاریخ نابارواٹی گپ وتران کننگ کیرہ۔ ننے دا وڑنا کلچر نا گرج ءِ و ہندا کلچر ننے مون آ دننگ کیک۔
