اسلام آباد۔ 24 جولائی (اے پی پی) بنجائی وزیر حوالکاری و شینکاری مریم اورنگزیب میڈیا ورکرز و صحافی تیکن ہیلتھ انشورنس فارم نا آن لائن بناءِ کرے۔ دوشنبے نادے آ داڑے پی ٹی وی ہیڈ کوارٹرز اٹی بنجائی وزیر حوالکاری صحافی تیکن آن لائن رجسٹریشن فارم اس جاری کرے ہرا وزارت حوالکاری و پریس انفارمیشن ڈیپارٹمنٹ نا ویب سائٹ آتیا ساڑی ءِ، صحافی آن لائن ہیلتھ انشورنس فارم نا کمک اٹ تینا رجسٹریشن ءِ کننگ کیرہ۔ داوخت آ پرنسپل انفارمیشن آفیسر مبشر حسن تون اوار صحافیک ہم ساڑی ئسر۔ صحافی تے جان جوڑی نا دا آسراتی ءِ پرائم منسٹرہیلتھ انشورنس اسکیم میڈیا ورکرز اینڈ جرنلسٹس 2023ء نا رداٹ تننگ انگ ءِ ہراڑکن حکومت بنجائی بجٹ اٹی اسہ ارب روپئی نا بھلو زر اس جتا کرینے۔ دا اسکیم آن مچ آملک انا صحافیک فائدہ ہرفنگ کیرہ، داڑکن پریس کلب نا باسک مننگ المی اف۔ آن لائن رجسٹریشن فارم نا بناءِ ممکن کننگ آ بنجائی وزیر حوالکاری سیکرٹری حوالکاری سہیل علی خان ، پی آئی او مبشرحسن و وزارت حوالکاری ناٹیم ءِ مبارکبادی تس۔
