صدر مملکت ڈاکٹر عارف علوی نا ایتھوپیا ٹی پاکستان نا پندار سفیر تون گپ وتران

اسلام آباد۔ 24 جولائی (اے پی پی) صدر مملکت ڈاکٹر عارف علوی ایتھوپیا تون واپاری و اقتصادی رابطہ غاتے مون آ دننگ تون اوار ہڑتوم آ ملک آتا کاروباری برادری تا نیام اٹ رابطہ غاتے آسان کننگ و ودفنگ نا گرج آ زور شاغسا پارینے کہ پاکستان۔ ایتھوپیا تعلقداری اسیجائی تاریخ، فائدہ و جہانی فورم تیا تین پہ تینی مخ تفی آ تالان ءِ۔ دوشنبے نادے آ ایوان صدر نا پریس ونگ آن جاری بیان نا رداٹ صدر مملکت داخیال آتا درشانی ءِ ایتھوپیا ٹی پاکستان نا پندار سفیر میاں عاطف شریف تون اوڑدہی ٹی کرے۔ اوسفیر آ زور شاغانے کہ او پاکستانی مصنوعات آتا درآمد کن ایتھوپیا نا پوریاگرآتسکان سرمرسا ایتھوپیا تون واپاری کچ ءِ ودفنگ کن کاریم کیر۔ اوپارے کہ ایتھوپیا تون واپاری و اقتصادی رابطہ غاتا مون آ دننگ نا گرج ءِ، پاکستان و ایتھوپیا نا کاروباری بندغ آتا نیام اٹ رابطہ غاتے آسان و گچین کننگے، پندار سفیر پاکستانی مصنوعات آتا دوئی، ہڑتوم آ کنڈآتا واپاری کچ ءِ ودفنگ کن کاریم کیر۔ صدر مملکت ایتھوپیا تون تعلیم نا بشخ اٹی کمکاری و السی رابطہ غاتے ودفنگ آ زور شاغا و پارے کہ ایتھوپیا نا طالب علم آک تینا مہارت آتے ودفنگ کن ورچوئل یونیورسٹی، علامہ اقبال اوپن یونیورسٹی نا آن لائن /ویڈیو تعلیمی معاد آتیان فائدہ ہرفنگ کیرہ۔ صدر پارے کہ پاکستان اٹ ایتھوپیا نا ورناسفارتکار آتا تربیت ، بینکنگ کورس آتیان ایتھوپیا تون ہڑتوم آ کنڈآتا تعلقداری پین گچین مریک۔ ڈاکٹر عارف علوی دنیا ٹی اسلاموفوبیا نا توننگ، بین المذاہب ہم گرنچی و تین پہ تینی شرف نا مون آ دننگ کن اجتماعی کوشست آتا گرج آ زورشاغا و پارے کہ پندار سفیر بھارت نا غیر کانودی کوزہ ٹی جموں و کشمیر اٹی بھارت نا کنڈآن انسانی حق انا خلاف ورزی ، ظلم آتے تالان کیر۔ صدر مملکت پارے کہ پندار سفیر بھارت اٹ اقلیت آتون ناروا سلوک ءِ ہم تالان کے۔