لاہور۔ 24 جولائی (اےپی پی) وزیراعظم محمد شہباز شریف پارینے کہ حکومت لس بندغ ءِ بنداوی آسراتی تا فراوانی کن غٹ وسیلہ غاتے کاریم اٹ اتنگ ءِ، آذربائیجان و پاکستان نا نیام اٹ ایل این جی معاہدہ غان تین پہ تینی تعلقداری نا پوسکن ءُ کسر ملنگک ، ہڑتوم آ ایلم ملک آتا نیام اٹ تعلقداری نا بابت اینو اسہ اہم ءُ دے اسے۔ اوداخیال آتا درشانی ءِ دوشنبے نادے آ گورنر ہاؤس لاہور اٹی پاکستان و آذربائیجان نا نیام ات پیٹرولیم نا صنعت اٹ کمکاری نا معاہدہ نا بابت اڈ ہلوک دود آن تران کرسا کرے۔ وزیراعظم محمد شہباز شریف پارے کہ اینو نا دے ہڑتوم آ ایلم ملک آتا نیام اٹ تعلقداری نا بابت اسہ اہم ءُ دے اسے۔ حکومت پاکستان آذربائیجان تون ماہانہ اسہ جہاز ایل این جی اس ہلیک۔ ہلنگ نا اختیار پاکستان تون مریک ہراڑان ایل این جی ہلپننگ آ ہرجانہ مفک۔ دا معاہدہ غان ملک اٹی اڑزان ایل این جی دُوبریک و دا انرجی نا تنکی تون مون تننگ اٹ بھاز بھلو پیش رفت اس جوڑ مریک۔ وزیراعظم محمد شہباز شریف پارے کہ دامعاہدہ نا مد اسہ سال اسکان ءِ ہرادے پین اسہ سال اسکان ودفنگ مریک۔ اوپارے کہ داپیٹرولیم معاہدہ نا بابت تدوک آ سال آذربائیجان اٹی صدر الہام علیوف تون جوان گپ وتران مسوسس۔ وزیر مملکت ڈاکٹر مصدق ملک ، سیکرٹری پیٹرولیم و وزیر خزانہ اسحاق ڈار و اونا ٹیم دا معاہدہ ٹی تینا پبی کڑد ءِ ادا کرے۔ وزیراعظم شہباز شریف پارے کہ ای آذربائیجان نا صدر و پاکستان اٹ آذربائیجان نا سفیر نا ہم منت واری ءِ ہرفیوہ، ہرا دامعاہدہ ءِ ایسر اسکان سرکننگ کن پبی کڑد ادا کرے۔ وزیر اعظم شہباز شریف پارے کہ آئی ایم ایف تون معاہدہ نا سوب آن بجلی نا نہاد آتیٹی ودکی کروئی تما ولے حکومت داودکی نا بھاریم ءِ نیزگاربندغ آ تخپک۔ 31 درسد اُرائی صارف آتے جزوی سبسڈی تننگانے۔ بجلی نا 200 یونٹ اسکان نا اُرائی صارف آتیا نہاد اٹی ودکی نا اطلاق مفک۔ داوخت آ آذربائیجان نا سفیر پارے کہ معاہدہ ہڑتوم آ ملک آتا نیام اٹ برادرانہ تعلقداری تا ڈیک ءِ و ہڑتوم آ کنڈآتا واپار نا کچ اٹی ودکی کن اہم پیش رفت اسے۔ دا معاہدہ غان ہڑتوم آملک آتا تعلقداری پین گچین مریک۔ اومستی پارے کہ نن پاکستان تون پین بشخ آتیٹی تعلقداری تا خواہندار اُن۔ اوکان پد پاکستان و آذربائیجان نا نیام اٹ پیٹرولیم نا صنعت اٹی معاہدہ نا دستاویز آتیا دستخط کننگا۔ گورنر پنجاب بلیغ الرحمان ، وزیر مملکت پیٹرولیم مصدق ملک، سیکرٹری پیٹرولیم، پاکستان اٹ آذربائیجان نا سفیر، آذربائیجان نا پیٹرولیم کمپنی نا چیف ایگزیکٹیو و ایلوفک ہم داوخت آ ساڑی ئسر۔
