اسلام آباد ۔ 20جولائی (اے پی پی) صدر مملکت ڈاکٹر عارف علوی پارے کہ ننا واکداری بحیثیت قوم ننا سیوت و سخاٹی ءِ، نن غٹ اواری اٹ ہرچیلنج نا مون ءِ توننگ کینہ و تینا و بروک آچین تیکن اسہ روشنا آخبت اس جوڑ کننگ کینہ، ننے پاکستان اٹ ساڑی غٹ بندغ آتے ملک انا شونداری ٹی بشخ شاغنگ کن وارخواہی فراوان کروئی ءِ۔ ہجری سال نو 1445ھ نا وخت آ قوم انا پن تینا کلہو اٹی صدر مملکت پارے کہ یکم محرم الحرام آن اسلامی ہجری کیلنڈر نا سال 1445ھ بناکننگءِ۔ ای اللہ تعالیٰ نا حضور دعاکیوہ کہ دا ہجری سال پاکستان، پاکستانی قوم، عالم اسلام و مچ آ دنیا کن رحمت و برکت نا سوب مرے۔ اوپارے کہ اسلامی سال نو نا بنامچ آ دنیا نا مسلمان تیکن بھاز اہمیت تخک ۔ سال نو اسلام نا خاطر تروک آ قربانی تے یات کرسا تینا ایمان و عزم ءِ سوگو کننگ نا ذریعہ ءِ۔ دا پوسکن آ ہجری سال انا بناآ نن داہیت انا عزم ءِ کینہ کہ تینا نبی پاک صلی اللہ علیہ وآ لہ وسلم نا زند و اونا رغاموک آتیان سبخ ہلینہ و اونا پاروک آ درس حیات ءِ تینا زند اٹی اتینہ۔ تینا راج اٹ ہمدردی، انصاف و سیوت و رواداری نا اصول آتے برقرارتخنگ نا کوشست کینہ ۔ دا قدر ننا اسلامی میرات نا مرکز ءِ و ہم آہنگی و شونہالی ءِ مون آ دننگ کن المی ءِ۔ صدر پارے کہ محرم اسلامی کیلنڈر نا اولیکو تُو ءِ ، و دا ننا روحانی زند اٹی اسہ پوسکن ءُ سفر اسے نا بناءِ کیک۔ ولے محرم اسہ ہندن ءُ تُو اس ہم ارے ہراٹی نن تینا پیغمبر محمد صلی اللہ علیہ و آلہ وسلم نا نواسہ سیدنا امام حسین رضی اللہ عنہ و اونا عظیم سنگت آتا کربلاجنگ اٹی شہیدی و قربانی تے یات کینہ۔
