اسلام آباد۔ 20 جولائی (اے پی پی) بنجائی وزیر موسمیاتی بدلی و چاگڑدی رابطہ سینیٹر شیری رحمان پارینے کہ چیئرمین بلاول بھٹو زرداری سندھ اٹی نوکاپ آن زہمی بےاُرا بندغ آتیکن پوسکن اُراتا تفنگ نا قول کریسس ہرا دنیا نا غٹ آن بھلا بحالی ڈٹ ’سندھ پیپلز ہاؤسنگ فار فلڈ ایفیکٹیز ‘‘ نا رداٹ پورو مننگ ءِ۔ پنچ شنبے نادے آ تینا اسہ ٹویٹ اسے ٹی او پارے کہ تدوک آ سال انا تاریخی نوکاپ آن صوبہ سندھ غٹ آن زیات زہمی مسوسس، لکھ آ اُرا بھس و مخلوق بے اُرا مسوسس، زہمی مخلوق نا بحالی و بھس مروک اُراتا پوسکن تفنگ کن چیئرمین بلاول بھٹو نا کماشی ٹی حکومت سندھ دنیا نا غٹ آن بھلا بحالی ڈٹ ’’سندھ پیپلزہاؤسنگ فار فلڈ ایفیکٹیز ‘‘ نا بناءِ کرے ہرانا رداٹ نوکاپ آن زہمی بے اُرا مروک آ بندغ آتے پوسکن اُرانا تفنگ کن مالی کمک فراوان کننگ انگ ءِ اُرانا تفنگ کن داتم اسکان 50 ہزار بندغ آتے اولیکو قسط فراوان کننگانے، 5 ہزار زہمی مخلوق ءِ داڈغار تا مالکانہ حق تننگ نا بناہم مسنے۔ اوپارے کہ چیئرمین بلاول بھٹو زرداری بےاُرا بندغ آتون پوسکن آ اُراتا تفنگ ناقول کریسس ہرا دا ڈٹ انا رداٹ پورو مننگ ءِ، پیپلزپارٹی نوکاپ زہمی مخلوق نا پورو بحالی اسکان داوڑنا کوشست آتے برجاتخک۔
