اسلام آباد۔ 20 جولائی (اے پی پی) وزیر مملکت پیٹرولیم مصدق ملک پارینے کہ چیئرمین پی ٹی آئی ذاتی فائدہ کن آئین و کانود ءِ لتاڑا، و تینا سوغند ءِ پرغا، سائفر ءِ سیاسی مسخت آتیکن کاریم اٹ اتنگا، عمران خان بطور وزیراعظم سیکرٹ ایکٹ نا خلاف ورزی ءِ کرے، ہزار آ مخلوق نا مون آ جلسہ ٹی پارے کہ سائفر گم مسنے، آئین نا رداٹ ملک انا اودیم دستاویز آتے ظاہر کننگ مفک۔ داخیال آتا درشانی ءِ او پنچ شنبے نادے آ داڑے پریس کانفرنس آن تران کرسا کرے۔ مصدق ملک پارے کہ پی ٹی آئی نا چیئرمین جلسہ ٹی ہزار آ مخلوق نا مون آ پرچی اس چست کرسا پارے کہ دا ریاست پاکستان نا اودیم دستاویز ءِ ہرانا رکھ انا زمواری وزیراعظم تون اوار غٹ آ ٹی ءِ۔ ہروئی دادے کہ عمران خان جلسہ ٹی سائفر ءِ چست کرفے تو داکانود نا خلاف ورزی مسنے کہ آخا ہرانا رداٹ غٹ اودیم دستاویز آتے اودیم تخنگ نا پابندی ءِ ۔ کابینہ، پارلیمنٹ و وزیراعظم نا حلف اٹی دا نوشتہ ءِ کہ اسہ ہم ہندن ءُ اودیم گڑاسے پاش کننگ مفک ہرادے اودیم تخنگ نا آئین نا رداٹ زمواری ءِ۔
