اسلام آباد۔ 19 جولائی (اے پی پی) وزیراعظم محمد شہباز شریف پارینے کہ پاکستان نا ورناتے تینا توانائی تے مثبت وڑاٹ کاریم اٹ اتنگ نا وارخواہی فراوان کننگ کن تدوک آ دے ملک گیر گوازی تا مون آ دننگ و جہانی آب انا آسراتی تا فراوان کننگ کن یوتھ اسپورٹس انیشی ایٹیو نا بناءِ کرینن۔ چارشنبے نادے آ تینا ٹویٹ اٹی اوپارے کہ پاکستان نا آبادی نا گیشتری ورناتیا تالان ءِ ولے بدبختی اٹ نئے بیرہ ہندی بلکن جہانی گوازی تیکن ہم آسراتی تا کمتی ءِ۔ دانا رداٹ نن ملک انا اولیکو سپورٹس یونیورسٹی نا بنداو و اسپورٹس اینڈوومنٹ فنڈ اس جوڑ کرینن۔ داکان بیدس لائخ و گچین کارکڑد نشان تروک آ گوازی گر آتا است بڈی، جہانی مقابلہ غاتیکن گوازی گرآتا تربیت و ایلو گام گیج آتیان مچ آ ملک اٹی گوازی تا مون آ دننگ ءِ پک کننگک۔ تاریخ گواہ ءِ کہ پاکستان نا لائخ ورناتے ہراتم ہم موقع تننگا، اومچ آ دنیا ٹی سوز ہلالی بیرک ءِ تینا گچین کارکڑد اٹ سربلند کریر۔ کنے داہم درک ءِ کہ دا گام گیج گنج اس اف ولے دا اسہ گچین ءُ بناسے، کنے پورو اومیت ءِ کہ بروک آ حکومت آک دا گام گیج آتا تسلسل ءِ برجاتخرہ۔
