اسلام آباد۔ 19 جولائی (اے پی پی) صدر مملکت ڈاکٹر عارف علوی پارینے کہ پاکستان و اردن نا نیام اٹ اسیجائی دودوربیدگ و تاریخ نا بنداو آ گچین برادرانہ تعلقداری ءِ، پاکستان اردن تون واپار، زرگزران، دودوربیدگ و دفاع نا بشخ آتیٹی تینا تعلقداری تے پین سوگو کننگ نا خواہندار ءِ۔ صدر مملکت داخیال آتا درشانی ءِ پاکستان اٹ اردن نا دزکش مروک سفیر ابراہیم یالا المدنی تون گپ وتران کرسا کرے ہرا چارشنبے نادے آداڑے ایوان صدر اٹ اوڑتون اوڑدہی کرے۔ صدر ہڑتوم آ ایلم ملک آتا تین پہ تینی فائدہ غاتیکن اردن تون اقتصادی و واپاری بشخ آتیٹی کمکاری ءِ ودفنگ نا گرج آ زور شاغا۔ اوہڑتوم آ ایلم ملک آتے پین خڑک اتنگ کن سیاسی، دودوربیدگی و تعلیمی تبادلہ غاتیا ہم زور شاغا۔ صدر اردن نا امن کوشست و سیاسی و سفارتی ذریعہ اٹ فلسطین نا ویل انا مخ تفی نا ستاءِ کرے۔ اوفلسطین نا الس نا حق خودارادیت کن پاکستان نا آخبتی مخ تفی نا درشانی ءِ کرے۔ اسلاموفوبیا نا ودوک آ واقعہ غاتیا گڑتی نا درشانی ءِ کرسا صدر مملکت جہانی برادری ناکنڈآن داوڑنا واقعہ غاتا توننگ کن گچین گام گیج کننگ نا گرج آ زور شاغا ۔ اوپارے کہ بین المذاہب ہم آہنگی، رواداری و اسہ ایلو نا مذہب نا تین پہ تینی شرف ءِ مون آ دننگ نا گرج ءِ۔ صدر مملکت اردن نا دزکش مروک آ سفیر نا پاکستان اٹ اڈکننگ نا وخت آ ہڑتوم آ ملک آتا نیام اٹ ہڑتوم آ کنڈآتا کمکاری ءِ گچین کننگ نا کوشست آتا ستاءِ کرے۔
