اسلام آباد ۔ 19 جولائی (اے پی پی) وزیراعظم نا رابطہ کار زرگزران و توانائی بلال اظہر کیانی پارینے کہ کشت وکشار نا بشخ آ ہچ ءُ خراج اس خلپننگ ءِ ، پاکستان ءِ خواتہ مننگ نا دنگ آ سرکروک آک داسہ آئی ایم ایف پروگرام نا برخلاف کوشست کننگ ءُ، پاکستان مسلم لیگ ن دُوارہ اقتدار اٹ برسا ملکی شونداری و سوگوی نا سفرءِ برجاتخک۔ چارشنبے نادے آ داڑے پریس کانفرنس کرسا بلال اظہر کیانی پارے کہ حکومت نا گام گیج آتیان ملک اٹی زرگزرانی سوگوی بسنے ، حکومت آئی ایم ایف تون 9 تُو انا معاہدہ کرینے، دا پروگرام وزیراعظم نا کوشست آتے اٹ مسنے و مچ آ ملک اٹی دا معاہدہ نا ستاءِ کننگا، 3 جولائی آ اسٹاک ایکسچینج اٹی 2343پوائنٹ آتا ودکی مس، انڈکس 45 ہزار نا حدءِ عبور کرے۔ فچ ننا ریٹنگ ءِ گچین کرے، کاروباری و پوریاگربرادری دانا ستاءِ کرے۔ اوپارے کہ وزیراعظم تینٹ ہم پارے کہ آئی ایم ایف آن وام تا دوئی کننگ لمحہ فکریہ سے ولے دا معاہدہ ءِ کننگ پاکستان کن المی ئسک۔
