اسلام آباد۔ 19جولائی (اے پی پی) نیشنل ایمرجنسی آپریشنز سینٹر (این ای او سی) نا اسہ خصوصی دیوان اسے ٹی محکمہ موسمیات نا کمامدارآک 19 جولائی آن 24 جولائی ٹی ملک انا چندی علاقہ غاتیٹی پِر تا بابت سرجم حوال تسر ۔ دیوان نا کماشی ءِ ممبر آپریشن این ڈی ایم اے کرے وخت اس کہ پاک فوج، محکمہ موسمیات ، فلڈ فورکاسٹنگ ڈویژن پی ایم ڈی، صوبائی ڈیزاسٹر مینجمنٹ اتھارٹی ، جی بی ڈی ایم اے ، ایس ڈی ایم اے، ڈیم اتھارٹیز، غٹ صوبائی محکمہ ایری گیشن، اسلام آباد ایڈمنسٹریشن، سپارکو و ریسکیو 1122 تون اوار ایلو تعلقدار محکمہ غاک ہم دیوان اٹی بشخ ہلکر۔ دیوان اٹی غٹ محکمہ غاک پِر انا ساڑی آ چرجوئی ٹی چندی علاقہ غاتیٹی اونا گمانی اثر و ر یسکیو نا تیاری تا بابت حوال تننگا۔ پنجاب ایری گیشن ڈیپارٹمنٹ پارے کہ بروک آ 12 گھنٹہ ٹی دِیر انا ترند بہاؤ شاہدرہ نا نشیبی آبادی تیٹی نوکاپ نا سوب جوڑ مننگ کیک۔ ممبر آپریشن پارت کرے کہ تعلقدار پنجاب انتظامیہ علاقہ مکین آتے وخت آ آگاہی ترسا کشنگ نا عمل نا بناءِ کے۔ ڈی ایم اے پنجاب و ریسکیو سروسز ایمرجنسی عملہ و مشینری بشمول ڈی واٹرنگ پمپس تون اوار گمانی نوکاپی حالیت آتا رداٹ ہائی الرٹ آ سلر۔ ڈیم اتھارٹیز پارے کہ منگلا ، تربیلا و سملی ڈیم اٹی دِیر انا بہاؤ فی الحال نارمل ءِ۔ جی بی ڈی ایم اے و ایس ڈی ایم اے نا نمائندہ غاک پاریر کہ پِر تیٹی غٹ کسر تے کلیئر کننگ کن مشینری وعملہ چندی جاگہ غاتیا ساڑی و ایمرجنسی حالیت آتون مون تننگ کن تیار ءُ۔ ممبر آپریشن پِر تیان ودی مروک آ حالیت آتا رداٹ تعلقدار صوبائی و ضلعی انتظامیہ ءِ الرٹ مننگ و سیل وسواتی/مسافر آتے وخت آ معلومداری فراوان کننگ نا پارت ہم تس۔
