اسلام آباد۔ 18 جولائی (اے پی پی) بنجائی وزیر موسمیاتی بدلی و چاگڑدی رابطہ سینیٹر شیری رحمان پارینے کہ سعدیہ دانش نا گلگت بلتستان اسمبلی نا اولیکو زالبول ڈپٹی اسپیکر نا وڑاٹ گچین کاری گلگت بلتستان و مچ آ ملک اٹی زالبول آتا نمائندگی نا بابت اہم ءُ پیش رفت اسے۔ پیپلزپارٹی نا زالبول آتے واکدار کننگ و اوفتے ملک اٹی اہم عہدہ غاتیا تعینات کننگ نا شاندار ٹریک ریکارڈ ءِ۔ سے شنبے نادے آ تینا اسہ ٹویٹ اسے ٹی اوپارے کہ پیپلزپارٹی نا عظیم قائد شہید گودی بینظیر بھٹو پاکستان نا اولیکو زالبول وزیراعظم نا وڑاٹ تاریخ اس نوشتہ کرے، اونا دلیرانہ کماشی ایلو زالبول آتیکن سیاست اٹ بننگ و ملک انا حکمرانی ٹی اہم کڑدادا کننگ نا کسر ءِ آوار کرے۔ بنجائی وزیر پارے کہ صنفی بریبری نا مون آ دننگ نئے بیرہ زالبول آتے واکدار جوڑ کیک بلکن ملک انا جمہوری بنداوتےہم سوگو کیک۔ زالبول آتے واکدار کننگ ا وفتے مرکزی دنگ اٹ عہدہ غاتیا تعینات کننگ کن پاکستان پیپلزپارٹی نا سرکڑدہ سفت نا حقدار ءُ۔
