اسلام آباد۔ 17 جولائی (اے پی پی) وزیراعظم محمد شہبازشریف آئی ایم ایف تون معاہدہ نا چرجوئی ٹی پاکستان نا مخ تفی و کمک ءِ کننگ آ سری لنکا نا صدر نا منت واری ءِ ہرفسا اومیت ظاہر کرینے کہ پاکستان وسری لنکا ساڑی آ زرگزرانی مشکل آتا مین آن زوت پیش تمرہ۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف سری لنکا نا صدر رانیل وکرماسنگھے تون ٹیل فون آ گپ وتران کرے۔ وزیراعظم شہباز شریف آئی ایم ایف تون معاہدہ نا چرجوئی ٹی پاکستان نا مخ تفی و کمک ءِ کننگ آ سری لنکا نا صدر نامنت واری ءِ ہرفے۔ وزیراعظم پارے کہ نی پاکستان نا سنگت و خیرخواہ نا کڑد ءِ ادا کریس۔ پاکستان نا الس نا کنڈآن نا منت واری ءِ ہرفیوہ۔ اوپارے کہ پاکستان و سری لنکا خڑکی باپت سنگت ءُ، علاقائی شونداری و امن کن سری لنکا نا کڑد ءِ خراج تحسین پیش کینہ۔ اوپارے کہ اومیت ءِ کہ پاکستان و سری لنکا ساڑی زرگزرانی مشکل آتا مین آن زوت پیش تمرہ۔ سری لنکا نا صدر رانیکل وکرما سنگھے وزیراعظم نا کنڈآن نیک است خواہی تیا منت واری نا درشانی ءِ کرے و ورندی خیرخواہی نا جوزہ غاتا درشانی ءِ کرے۔ اوپارے کہ پاکستان ننا خڑک انا سنگت ءِ، سنگت آتا کمک ءِ کننگ ہی سنگتی ءِ۔ سری لنکا نا صدر وزیراعظم شہباز شریف نا مشکل حالیت آتیٹی کوشست آتا ستاءِ کرے۔ سری لنکا نا صدر آئی ایم ایف معاہدہ طے مننگ آ وزیراعظم ءِ مبارکبادی تس۔ یات سلے کہ وزیراعظم شہباز شریف نا آئی ایم ایف نا منیجنگ ڈائریکٹر کرسٹلینا جورجیواتون اوڑدہی نا وخت آ سری لنکا نا صدر زور شاغاسس کہ آئی ایم ایف پاکستان نا کمک ءِ کے۔ سری لنکا نا صدر ایم ڈی آئی ایم ایف ءِ پاریسس کہ خواتہ مننگ نا سوب آن سری لنکا ءِ چندی مصیبت آتا گواچی مروئی تما، پاکستان ءِ داحالیت آتیان بچفنگے۔
