لاہور۔ 17 جولائی (اے پی پی) تحریک انصاف نا صدر و مسکوہی وزیراعلیٰ پنجاب چوہدری پرویز الٰہی ءِ اسہ تُو اکن نظر بند کننگا۔ ڈپٹی کمشنر لاہور نا کنڈآن نوٹیفکیشن ہم جاری کننگانے۔ چوہدری پرویز الٰہی نا نظربندی کن سی سی پی او لاہور ڈپٹی کمشنر ءِ مراسلہ اس نوشتہ کریسس ہراٹی موقف اختیار کننگاسس کہ چوہدری پرویز الٰہی پی ٹی آئی نا سرکڑدہ راہشون و صدر ءِ، اوڑان امن و ایمنی ءِ نسخان مننگ کیک، خواست ءِ کہ اودے اسہ تُواکن نظر بند کننگے۔ ڈی سی لاہور نا کنڈآن جاری نوٹیفکیشن نا رداٹ چوہدری پرویز الٰہی ءِ تھری ایم پی او نا رداٹ اسہ تُواکن نظر بند کننگانے۔ نوٹیفکیشن نا رداٹ پرویزالٰہی بروک آ اسہ تُو کیمپ زندان اٹی مریک۔ یات سلے کہ مسکوہی وزیراعلیٰ پنجاب چوہدری پرویزالٰہی نا برخلاف مسہ مقدمہ درج ءُ و مہالو آن لاہور نا ڈسٹرکٹ کیمپ زندان اٹی جوڈیشل ریمانڈآٹی ءِ۔ نظر بندی نا نوٹیفکیشن اٹی تھانہ قلعہ گجر سنگھ اٹ 4، غالب مارکیٹ اٹ درج اسہ مقدمہ سے نا ذکر ءِ کننگانے و پاننگانے کہ چوہدری پرویز الٰہی دا کیس آتیٹی پولیس ءِ درکارہم ارے۔ داکان بیدس دوشنبے نادے آ ہی مسکوہی وزیراعلیٰ پنجاب چوہدری پرویز الٰہی تینا نظر بندی نا پرمان تے لاہور ہائیکورٹ اٹ چیلنج کرینے۔ چوہدری پرویز الٰہی نا کنڈآن عامر سعید راں ایڈووکیٹ لاہور ہائی کورٹ اٹی دائر درخواست اٹی ڈی سی لاہور تون اوار ایلوفتے فریق کرینے و موقف اختیار کرینے کہ پرویزالٰہی ءِ سیاسی بیر انا شست کننگ انگ ءِ ، پرویزالٰہی نا غٹ مقدمہ غاتیٹی ضمانت منظور مسنے، عدالت دہشت گردی نا مقدمہ ٹی ہم پرویز الٰہی ءِ رکھی ضمانت تسنے۔
