چشمہ۔5ڈٹ آن ملک ءِ ساف، گچین و نسبتاََ اڑزان توانائی ءِ مون آ دننگ اٹ کمک رسینگک ، وزیراعظم شہباز شریف نا دود آن تران

میانوالی۔ 14 جولائی (اے پی پی) وزیراعظم محمد شہباز شریف 3 ارب 48 کروڑ ڈالر مالیت نا 1200 میگاواٹ نا حامل چشمہ۔ 5 ڈٹ انا بنداو ءِ تخا ہرا7 آن 8 سال اٹی پورو مریک، 30 جون 2023آ وزیراعظم نا ساڑی گری ٹی چائنا نیشنل نیوکلیئر کوآپریشن اوورسیز لمیٹڈ (سی این او ایس) و پاکستان اٹامک انرجی کمیشن (پی اے ای سی ) نا نیام اٹ مفاہمت نا یات داشت آ دستخط مسوسس۔ جمعہ نادے آ بنداوی دود آن تران کرسا وزیراعظم پارے کہ ساف ستھرا و اڑزان توانائی نا ذریعہ نا ملکی گرج آتے مون آتخسا ڈٹ ءِ مقررہ وخت آن مست پورو کننگے، دا ڈٹ اسہ بھازبھلو مزل و اِرا عظیم سنگت ملک  چین و پاکستان نا نیام اٹ کمکاری نا نشانی ءِ، ہراڑان ملک ءِ ساف، گچین ونسبتاََ اڑزان توانائی نا مون آ دننگ اٹ کمک رسینگک۔ اوپارے کہ کیہی سال انا وقفہ غان پد چین۔ پاکستان اقتصادی راہداری ڈٹ آ کاریم اسہ وار ولدا زور تیاٹی ءِ۔ اوپارے کہ چشمہ ۔ 5 نامعاہدہ ءِ ایسر اسکان سرکننگ ناسہرا مخلوط حکومت و ایس ڈی پی نا سر ءِ۔ وزیراعظم پارے کہ ننا مخالف ہر کنڈا دا ہوکا تالان کریکہ کہ پاکستان خواتہ مننگ ءِ ولے نن بیرہ 15 تُواٹی غٹ اڑاند آتے مر کرین، حکومتی ٹیم انا کوشست آتیان ملک انا خواتہ مننگ نا خطرہ پورو وڑاٹ چٹانے۔ وزیراعظم پارے کہ جہانی مالیاتی فنڈ (آئی ایم ایف) نا پروگرام نا منہ دے مست منظوری ءِ تننگا و 48 گھنٹہ نا تہہ ٹی پاکستان نا ایلم ملک سعودی عرب و متحدہ عرب امارات نا کنڈآن کم و ود چار ءُنیم ارب ڈالر آن بیدس آئی ایم ایف آن اسہ ارب 20 کروڑڈالر منتقل مس ، چارتُو مست چینی حکومت و کمرشل بینک آک پاکستان ءِ پنچ ارب ڈالر نا زرءِ پدی گدریفیر۔ وزیراعظم چینی صدر شی جن پنگ، سعودی ولی عہد شہزادہ محمد بن سلمان و متحدہ عرب امارات نا صدر محمد بن زید النہیان ءِ مشکل وخت اٹ کمک کننگ آخراج تحسین پیش کرے۔ وزیراعظم پارےکہ مخلوط حکومت و اونا سنجیدہ کوشست آتا نتیجہ ٹی چینی کمپنی ڈٹ انا خڑچ ءِ 2017-18اٹی ہمووخت انا مسلم لیگ ن نا حکومت اٹی طے مروک کہول آ تخا و اوٹی اوسطا 10 درسد کبینی آن خڑچ اٹی ودکی اوار کتو، وخت اس کہ داکان بیدس اونا درخواست آ پاکستان ءِ 30 ارب روپئی نا ڈسکاؤنٹ ہم تس ہراہڑتوم آ ملک آتا نیام اٹ خلوص نا جوزہ غاتا عکاسی ءِ کیک۔ پاکستان اٹ چین نا سفارت خانہ ناناظم الامور پینگ چنگ سو پارے کہ چشمہ۔ 5 پاکستان ءِ کم کاربن، ساف و اڑزان توانائی ودی کننگ اٹ کمک ایتک ہراڑان ہندی کہول آ ملازمت ودی مریک۔ چائنہ نیشنل نیوکلیئر کوآپریشن نا چیئرمین یوجیان فنگ پارے کہ پاکستان و چین نا نیام اٹ جوہری توانائی نا بشخ اٹی کمکاری ہرموسم نا تزویراتی کمکاری آ تالان شریداری نا المی بشخ جوڑ مسنے۔ چینی ڈل انا سروک پنگ چنگ شوئے ہم تران کرے۔ چیئرمین چائنا نیوکلیئر کمیشن وزیراعظم ءِ سووینیئراس پیش کرے۔ داوخت آوزیر ڈٹ بندی و شونداری احسن اقبال ، وزیر توانائی انجینئر خرم دستگیر خان و چیئرمین پاکستان اٹامک انرجی ایجنسی ڈاکٹر راجہ علی رضا ئسک ہم ساڑی ئسر ۔ داوخت آ پاکستان اٹامک انرجی کمیشن نا ڈٹ آتا بابت دستاویزی فلم اس ہم نشان تننگا۔