صدر مملکت ڈاکٹر عارف علوی نا فرانس نا صدر ایمانوئیل میکرون نا پن آ چٹھی اس، قومی دے انا وخت آ پاکستانی الس و تینا کنڈآن مبارکباد

اسلام آباد۔ 14 جولائی (اے پی پی) صدر مملکت ڈاکٹر عارف علوی فرانس نا قومی دے انا وخت آ پاکستانی الس و تینا کنڈآن فرانس نا الس و حکومت ءِ مبارکبادی تسنے۔ ایوان صدر نا پریس ونگ آن جمعہ نادے آ جاری بیان نا رداٹ صدر مملکت فرانسیسی جمہوریہ نا صدر ایمانوئیل میکرون ناپن تینا چٹھی ٹی پارے کہ پاکستان و فرانس نا نیام اٹ خوشگوار تعلقداری ءِ، ہڑتوم آملک آتا تعلقداری تین پہ تینی پت، اسیجائی نقطہ نظر و کثیر الجہتی فورم تیا خڑکی کمکاری آ تالان ءِ۔ اوپارے کہ فروری ٹی دستخط کروک آ ہڑتوم آ کنڈآتا کمکاری نا روڈ میپ آن واپار ، السی رابطہ، تعلیم، موسمیاتی بدلی و توانائی کون آ بشخ آتیٹی کثیر الجہتی کمکاری ءِ سوگو کننگ اٹ کمک رسینگک۔ صدر مملکت یقین ظاہر کرے کہ صدر میکرون نا متحرک کماشی ٹی نن تینا ہڑتوم آ کنڈآتا تعلقداری ءِ تین پہ تینی فائدہ کن بڑزکو کہول آ دینہ۔ ڈاکٹر عارف علوی تینا چٹھی ٹی فرانس نا صدر کن گچین جان جوڑ و مسرت، فرانس نا الس نا پدریسہ شونداری و شونہالی کن نیک است خواہی نا درشانی  ءِ کرینے۔