پاکستان وتواجہ زرگزران نا کنڈا اسہ پین مزل اسے سرکرے

اسلام آباد۔ 14 جولائی (اے پی پی) پاکستان وتواجہ زرگزران نا کنڈا اسہ پین مزل اسے عبور کرے ، بنجائی وزیر مواصلات مولانا اسعد محمود نا کماشی ٹی طے مروک آ پاکستان روس واپاری معاہدہ سرسہب مس، معاہدہ نا رداٹ تاریخ اٹ پاکستان نا اولیکو پیش رفت مسس و روس آن براستہ تاجکستان، ازبکستان، اوغانستان واپاری گڑاپاکستان آ سرمس۔ وزارت مواصلات نا کنڈآن جمعہ نادے آ جاری بیان نا رداٹ بنجائی وزیر مواصلات مولانا اسعد محمود نا کنڈآن روس۔ پاکستان روڈ ٹو روڈ ٹرانسپورٹ نا معاہدہ 16 نومبر 2022آ طے مسوسس۔ بنجائی وزیر مولانا اسعد محمود مارچ اٹی روس دورہ ٹی انٹرنیشنل روڈ ٹرانسپورٹ نا معاہدہ کرے۔ بنجائی وزیر مواصلات مولانا اسعد محومد پارے کہ روس قدرتی وسیلہ و پوسکن آٹیکنالوجی آن شپ ءُ ملک اسے، دامعاہدہ نا رداٹ اولیکو شپ منٹ انا رداٹ پیہن آ دال و دسک انا ٹرک پاکستان آ سرمسنے۔ وزیر مواصلات پارے کہ دامعاہدہ نا رداٹ پاکستان و روس انا تعلقداری پین سوگو و گچین مریک۔ مولانا اسعد محمود پارے کہ وخت اتون اوار اوار روس آن پاکستان پین گڑاہم خوائفک۔ اوپارے کہ روس آن نن پیٹرولیم مصنوعات ہم خواہفنگ کینہ۔ پاکستان آن پچ، گوازی تا گڑا، و برنج نن روس ءِ ایتنہ۔ وزیر مواصلات مولانا اسعدمحمود پارے کہ انٹرنیشنل ٹرانسپور ٹ ایگریمنٹ دا بابت ہڑتوم آ ملک آتا نیام اٹ اہم ءُ کڑد اس ادا کیک اوپارے کہ ہڑتوم آ کنڈآتیان بارڈر کراسنگ پوائنٹ و کسٹم نا بابت سہل پاسداری ءِ پک کروئی مریک۔