ہمودے مراف ہراتم کشمیر نا باتیک جہد حق خودارادیت نا کمک اٹ بھارت نا کوزہ ٹی کشمیر اٹی آجوئی نا تغ ءِ پورو مرسا خنرہ، چیئرمین سینیٹ

اسلام آباد۔ 13 جولائی (اے پی پی) چیئرمین سینیٹ محمد صادق سنجرانی پارینے کہ ہمو دے مر اف ہراتم کشمیر نا باتیک تینا حق خودارادیت نا جہد نا کمک اٹ  مقبوضہ کشمیر اٹی آجوئی نا تغ ءِ پورو مرسا خنور،  پنچ شنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ تینا کلہو اٹی پارے کہ کشمیری شہیدآک 13 جولائی 1931ء آ ڈوگرہ فورس آتا اندھادھند سم کاری تون مون ترسا عظیم قربانی تسر، او یوم شہداء کشمیر نا وخت آ ہمو 22 کشمیری شہید آتے خراج عقیدت پیش کرے ہرافک 1931اٹی ڈوگرہ فورس آتا اندھا دھند سم کاری تون مون ترسا عظیم قربانی تسر۔ اوپارے کہ کشمیرنا ویل ءِ ایسر کننگ آن بیدس سویلی ایشیاٹی پائیدارامن مننگ کپک، جہانی برادری کشمیر اٹی بھارت نا کنڈآن کروک آ ظلم آتا سختی اٹ نوٹس ءِ ہلے و بھارت ناکوزہ ٹی کشمیر اٹی برجاانسانی حق انا خلاف ورزی تا چٹفنگ کن تینا کڑد ءِ اداکے۔ اونا پاننگ ئس کہ اینو ہم 9 لکھ آن زیات بھارتی فوج جموں و کشمیر آ کوزہ ءِ برقرار تخنگ کن کشمیری الس ءِ یرغمال کرینو ۔ محمد صادق سنجرانی پارے کہ سینیٹ کشمیر نا ویل ءِ تالان کننگ اٹ تینا گچین کڑد ءِ ادا کننگ ءِ، کشمیر نا ویل ءِ اقوام متحدہ نا سیکورٹی کونسل نا قرارداد آتا رداٹ ایسر کننگ و کوزہ گیر دامان اٹ بھارتی فوج انا ظلم و بربریت ءِتوننگ کن چندی قرارداد آتے منظور کننگانے، اینونن 1931ء نا ہیروتتون اوار اوار ہموغٹ بے گناہ  کشمیری تا انمول قربانی تے ہم خراج عقیدت پیش کینہ، ہرافک دا جہد اٹ تینا جون تے ندر کریر۔