جہانی بینک پنجاب اٹی خاہوتی ڈٹ بندی ناپروگرام کن 10 کروڑ ڈالرنا امداد نا منظوری ءِ تس

اسلام آباد۔ 13 جولائی (اے پی پی) جہانی بینک پنجاب اٹی خاہوتی ڈٹ بندی نا پروگرام کن 10 کروڑ ڈالر نا امداد نامنظوری ءِ تسنے ۔ پاکستان اٹ جہانی بینک انا کنٹری ڈائریکٹر ناجی بن حسائن پنچ شنبے نادے آ اسہ بیان اسے ٹی پارینے کہ جہانی بینک انا ایگزیکٹیو بورڈ پنجاب اٹی خاہوتی ڈٹ بندی نا خذمت آتیٹی گچینی اتنگ کن 10 کروڑ ڈالر نا امداد نا منظوری ءِ تسنے۔ اوپارے کہ داپروگرام نا بنداوی مسخت 2030 اسکان پنجاب اتی تولیدی صحت و خاہوتی ڈٹ بندی نا وڑوڈول آتے 60 درسد نا کہول آ سرکننگ ءِ۔ اوپارے کہ دا پاکستان کن اہم ءُ پروگرام اسے انتئے کہ ملک انا آبادی ٹی ترندی اٹ ودکی مننگ ءِ ہراڑان شونداری ونمو نا رفتار سست مننگ ءِ۔ پروگرام نا رداٹ خاہوتی ڈٹ بندی نا خذمت آتا مفت فراوانی ءِ پک کننگک و بہبود آبادی نا بابت آگاہی مہم ہم چلیفنگک۔ اوپارےکہ پنجاب نا گڑاس ضلع غاتیٹی مہالوآن پائلٹ پروجیکٹ نا بناءِ کننگانے، ہرانا مثبت اثرمون آ بسنے۔ جہانی بینک انا کمک اٹ دا پروگرام پنجاب ناغٹ ضلع غاتیٹی صوبائی محکمہ بہبود آبادی و محکمہ جان جوڑی نا کمکاری اٹ مون آ دننگک۔