صدر مملکت ڈاکٹر عارف علوی نا یوم شہداکشمیر آ کلہو

اسلام آباد۔ 13 جولائی (اے پی پی) صدر مملکت ڈاکٹر عارف علوی پارینے کہ جہانی برادری خاص وڑاٹ انسانی حق انا جہانی تنظیم و اقوام متحدہ نا انسانی حق انا مشینری ءِ مقبوضہ جموں وکشمیر اٹی انسانی حق و بھلا انسانی حالیت آتیا نوٹس ءِ ہلیر و اقوام متحدہ نا سلامتی کونسل نا تعلقدار قرارداد و کشمیری الس نا است خواہی نا رداٹ جموں وکشمیر نا جھیڑہ نا پرامن ایسری ءِ بایدے پک کننگے۔ 13جولائی 2023آ یوم شہدائے کشمیر آ تینا کلہو اٹی صدر مملکت پارے کہ 92 می یوم شہدائے کشمیر آ ہمو 22 کشمیری شہید آتے خراج عقیدت پیش کیوہ ہرافک 1931اٹی ڈوگرہ فورس آتا اندھا دھند سم کاری تون مون ترسا  عظیم قربانی تسر۔ دا است ہسون دے آ پاکستانی الس تینا کشمیری ایلم تتون 1931 نا شہید آتا قربانی تے یات کیک۔ اوپارے کہ دا ہیت است ہسونی نا سوب ءِ کہ کشمیریک اینو ہم بھارت نا ناروا کوزہ نا برخلاف جہد کننگ اٹی ءُ۔ اینو ہم 9 لکھ آن زیات کوزہ گیر بھارتی فوج جموں وکشمیر آ تینا ناروا کوزہ ءِ برقرار تخنگ کن کشمیری الس ءِ یرغمال کرینے۔ صدر مملکت پارے کہ بھارت نا5اگست 2019 نا غیر کانودی و اسہ کنڈی گام گیج کشمیری الس آن اوفتا جتا درستی راستی ءِ پُلنگ و اوفتے تینا ہی گل زمین آ اقلیت اٹ بدل کننگ نا اسہ پین کوشست اس ئسک۔ دا گام گیج آتیان پد کشمیری تا جوزہ غاتے ٹھیس ترسا بھارت یوم شہدائے کشمیر آ علاقائی عام تعطیل ءِ چٹفے ہرا 1948آن ہرسال اڈتننگاکہ۔ اوپارے کہ اینو نن 1931نا ہیروتتون اواراوار غٹ بے گناہ کشمیری تا انمول قربانی تے خراج تحسین پیش کینہ ہرافک دا انصاف اٹ جہد اٹ تینا جون تے ندر کریر۔ نن اسہ وار ولدا بھارت آ زور شاغنہ کہ او غیرکانودی وڑاٹ بھارتی کوزہ گیری ٹی جموں وکشمیر اٹی برجاجور ءِ دمددستی وڑاٹ تورے۔ انسانی حق انا غٹ خلاف ورزی تے بند کننگے، غٹ سیاسی بندی تے یلہ کننگے، فوجی گھیڑ ءِ چٹفنگے، مقبوضہ علاقہ نا آبادیاتی پنجر ءِ بند کننگ نا کوشست آتے بند کننگے و کشمیری الس ءِ تینا روا حق خودارادیت نا کاریم اٹ اتنگ کن ہلنگے۔