وزیراعظم نا بل گیٹس تون ٹیل فون آ گپ وتران

اسلام آباد۔ 11 جولائی (اے پی پی) وزیراعظم محمد شہباز شریف پارینے کہ پولیو نا چٹفنگ، مہلک ناجوڑی تیان  چناتے بچفنگ و غذائیت نا کمتی نا ویل آتا مون ءِ توننگ حکومت نا اولیت ءِ۔ داخیال آتا درشانی ءِ او سے شنبے نادے آ بل اینڈ ملینڈا گیٹس فاؤنڈیشن نا شریک چیئرمین بل گیٹس تون ٹیل فون آ گپ وتران کرسا کرے۔ وزیراعظم بل گیٹس تون جان جوڑی و سیکٹر پروگرام تا بابت امور آ گپ وتران کرے۔ وزیراعظم بل اینڈ ملینڈاگیٹس فاؤنڈیشن نا پاکستان اٹ خذمت آتا ستاءِ کرسا پارے کہ بل اینڈ ملینڈا گیٹس فاؤنڈیشن تون اواری اٹ برجاکمکاری ءِ پین گچین و نتیجہ خیز  جوڑ کننگ خواہک۔ اوپارے کہ وسیلہ غاتیٹی غٹ انا اوار ی کن ساڑی حکومت خصوصی چکار کننگ ءِ۔ بل گیٹس وزیراعظم شہبازشریف نا سرکڑدہ ئی و پولیو نا چٹفنگ کن پاکستان نا کوشست آتا ستاءِ کرسا پارے کہ پولیو دین آن چناتے معذور مننگ آن بچفنگ کن پاکستان نا پبی کمک ءِ برجاتخنہ۔ وزیراعظم و بل گیٹس غذائیت نا کمتی، سٹنٹڈ گروتھ (بے پورو نشوونما)، ناجوڑی تیان بچفنگ نا المی خذمت آتا فراوانی نا بابت ہم گپ وتران کرے۔ داکان بیدس مائیکرو پے منٹ گیٹ وے’’راست ‘‘ و قومی بچت پروگرام ءِ ڈیجیٹل کننگ نا بابت امور آہم سجفیر۔ وزیراعظم و بل گیٹ خڑکی کمکاری و شریداری عمل آن کاریم ءِ برجاتخنگ آ ہم امنا کریر۔ یات سلے کہ بل اینڈ ملینڈا گیٹس فاؤنڈیشن پاکستان اٹ جان جوڑ و ایلو راجی آسودہی تا پروگرام چلیفنگ ءِ۔