اسٹیٹ بینک اٹی اِرا ارب ڈالر ڈیپازٹ کننگ آ سعودی سرکڑدہ و ایلم الس نا منت وار اُن، وزیراعظم شہباز شریف نا ٹویٹ

اسلام آباد۔ 11 جولائی (اے پی پی) وزیراعظم محمد شہبا ز شریف اسٹیٹ بینک آف پاکستان اٹ اِرا ارب ڈالر ڈیپازٹ کننگ آ سعودی عرب نا سرکڑدہ و ایلم الس نا منت واری ءِ ہرفسا پارینے کہ سعودی عرب نا کنڈآن کمکاری نا فراوانی آن پاکستان نا اقتصادی بحالی و گچینی نا رداٹ ایلم ملک و جہانی برادری نا ودوک آ پت انا عکاسی مننگ ءِ۔ سے شنبے نادے آ تینا اسہ ٹویٹ اسے ٹی وزیراعظم محمد شہباز شریف پارے کہ پاکستانی الس نا کنڈآن او اسٹیٹ بینک آف پاکستان اٹ اِرا ارب ڈالر ڈیپازٹ کننگ آ سعودی عرب نا سرکڑدہ و الس نا منتو ار ءِ۔ وزیراعظم پارے کہ پاکستان کن مالیاتی کمکاری ءِ پک کننگ آ او خاص وڑاٹ تینا ایلم ولی عہد و وزیراعظم شہزادہ محمد بن سلمان نا منت وار ءِ۔ وزیراعظم پارے کہ سعودی عرب نا کنڈآن دا کمکاری آن پاکستان نا زرمبادلہ نا کوڑی تیٹی ودکی مریک۔ وزیراعظم پارے کہ سعودی عرب نا کنڈآن کمکاری نا فراوانی آن پاکستان نا اقتصادی بحالی و  گچینی نا رداٹ ایلم ملک و جہانی برادری نا ودوک آ پت انا عکاسی ہم مننگ ءِ۔ وزیراعظم پارے کہ نن پاکستان نا زرگزران اٹ گچینی اتنگ کن غٹ المی گام گیج آتیٹی سنبرینگوک اُن۔ وزیراعظم دا رداٹ بنجائی وزیر خزانہ سینیٹر محمد اسحاق ڈار و آرمی چیف جنرل عاصم منیر نا ہم منت واری ءِ ہرفے و اوفتا کڑد انا ستاءِ کرے۔