صدر ڈاکٹر عارف علوی نا گندھارا سمپوزیم نا بنائی سیشن آن تران

اسلام آباد۔ 11 جولائی (اے پی پی) صدر مملکت ڈاکٹر عارف علوی جہانی امن و چاگڑد ءِ مون تروک خطرہ غاتون مون تننگ کن اسیجائی و مربوط گام گیج آتے المی گوندسا پارینے کہ دنیا نا غٹ مذہب آک راج اٹ اخوت و بریبری آ زور شاغرہ ، مذہب آک امن کن بھلو جستجواس کرینو، خوانہ کہ امن و مہرومریبت نا کلہو لس مرے۔ داخیال آتا درشانی ءِ او سے شنبے نادے آداڑے ’’کلچرل ڈپلومیسی: پاکستان اٹ گندھارا تہذیب و بدھسٹ ہیریٹیج نا بحالی ‘‘ نا سرحال آ مسہ دے ئی گندھارا سمپوزیم 2023آن بطور مہمان خاص تران کرسا کرے۔ سمپوزیم نا بنائی سیشن اٹ اسلام آباد اٹ متعین چندی ملک آتا سفارت کار، مذہبی راہشون، چاہندار ءِ آثار قدیمہ، تعلیم نا چاہندار و ایلو زند انا بشخ آتیان تعلق تخوک آ اہم شخصیت آک بشخ ہلکر۔ مسکوہی سیکرٹری خارجہ سہیل محمود، وزیر مملکت و چیئرمین وزیراعظم ٹاسک فورس گندھارا ٹورازم ڈاکٹر رمیش کماروانکوانی تون اوار ایلو ملکی و درملکی مندوبین آک ہم بنائی دود آن تران کریر۔ صدر مملکت پارے کہ چندی تہذیب آتا بارواٹ چاہنگ کن چندی ملک آتا دورہ ءِ کرین، وادی سندھ انا تہذیب ناشمار دنیا نا اہم تہذیب آتیٹی مریک، مذہبی کتاب اٹی گندھارا تہذیب نا ہم ذکر ءِ۔ اوپارے کہ بدھانا تعلیمات امن، مہرومریبت و رواداری نا درس ایتک۔ ساڑی آ دور اٹ صبر و تحمل المی مسنے۔ صدر مملکت داہیت آ زور شاغا کہ چندی تہذیب آک اختلاف آتے گیرام کرسا باہم مننگ نا کوشست کیر۔ ڈاکٹر عارف علوی سمپوزیم نا اڈتننگ آانسٹیٹیوٹ آف سٹریٹجک سٹڈیز اسلام آباد و ایلو تعلقدار ادارہ غاتے مبارکبادی ترساپارے کہ غٹ مذہب آک امن نا ہیت ءِ کرینو و داڑکن مذہب آک بھلو کوشست اس کرینو۔ اوپارے کہ دنیا ءِ امن و گچین چاگڑد نا گرج ءِ۔ صدر مملکت پارے کہ دنیا ءِ جھیڑہ غاتیان اسہ پلو امن نا کنڈا بایدے کائے، و تہذیب آتے مون تروک خطرہ غاتے توروئی مریک۔