مچ آ ملک انا تعلیمی بورڈآتیا تالان انٹربورڈ کمیٹی فار چیئرمین نا 176می دیوان 13 آن 14 جولائی آ بلوچستان نا دارالحکومت کوئٹہ ٹی اڈ ہلیک ، چیئرمین بلوچستان بورڈ آف انٹرمیڈیٹ اینڈ سیکنڈری ایجوکیشن اعجاز عظیم بلوچ

کوئٹہ۔ 11 جولائی (اے پی پی) مچ آ ملک انا تعلیمی بورڈ آتیا تالان انٹربورڈ کمیٹی فار چیئرمین نا 176 می دیوان 13 آن 14 جولائی آ بلوچستان نا دارالحکومت کوئٹہ ٹی بٹنگ انگا، تاریخ اٹ اولیکووار کوئٹہ ٹی اڈ ہلوک تعلیمی بورڈ آتا دا قومی دیوان نا مہمانداری ءِ بلوچستان بورڈ آف انٹرمیڈیٹ اینڈ سیکنڈری ایجوکیشن کیک، داہیت ءِ بلوچستان بورڈ آف انٹرمیڈیٹ اینڈ سیکنڈری ایجوکیشن نا چیئرمین اعجاز عظیم بلوچ آئی بی بی سی دیوان نا اڈتننگ نا بابت  تیاری تا چرجوئی ٹی بلوچستان بورڈ انا آفیسر آتا دیوان آن تران کرسا پارے۔ چیئرمین بلوچستان بورڈ آف انٹرمیڈیٹ اینڈ سیکنڈری ایجوکیشن پارے کہ دا قومی دیوان اٹ جم وڑاٹ 21 ایجنڈا پوائنٹ آ سجفنگک ہرافتے ٹی مچ آ ملک انا تعلیمی بورڈ آتیان جاری مروک آ رزلٹ کارڈ آتے اسہ وڑ ڈیزین نا رداٹ جاری کننگ، مارکس نا جاگہ غا گریڈنگ سسٹم نا نفاذ، عدالت عظمیٰ نا مصدرہ فیصلہ ءِمون آ تخسا میٹرک و انٹرمیڈیٹ اٹ مسلم طالب علم آتیکن قرآن پاک نا تعلیم، انٹربورڈ اسپورٹس کمیٹی نا چیئرمین نا گچین کاری تون اوار انتظامی امور نا بابت فیصلہ کننگک، اوپارے کہ گریڈنگ سسٹم نا نفاذ آن مارکنگ ریس چٹک و طالب علم آتا اہلیت نا بنداو آ پوزیشن دوئی کننگ کیک، فیڈرل بورڈ اٹ گریڈنگ سسٹم نافذ ءِ ولے ملک انا مر انگا علاقہ غاتیٹی بنداوی انفراسٹرکچر و آسراتی تا عدم دستیابی نا سوب آن مشکل مون تروک ئسک ولے داسہ صوبہ ہم گریڈنگ سسٹم آ ہِننگ ءِ، غٹ صوبہ غاتیٹی اسہ وڑ رزلٹ کارڈ فارمیٹ نا سوب آن تعلیمی دستاویز آتا ملک گیر اسہ وڑ اہمیت و پہچان مریک ۔ اعجاز عظیم بلوچ پارے کہ بلوچستان اٹ اولیکو وار انٹربورڈ کمیٹی فار چیئرمین نا دیوان مننگ ءِ داکان مست دا تاثر تننگاکہ کہ بلوچستان اٹ امن و ایمنی نا سوب آن دانا اڈتننگ ممکن اف ولے نن آئی بی بی سی نا باسک آتے باور کرفینن کہ بلوچستان اسہ پرامن و روایت آتا امین ءُ صوبہ اسے ہراڑے قومی کہول انا سرجزآتا اڈتننگ ممکن ءِ۔