اسلام آباد۔ 10 جولائی (اے پی پی) جہانی بینک خیبرپختونخوا نا اوار مروک ضلع غاتیٹی جان جوڑی نا خذمت آتا فراوانی نا نظام اٹی گچینی کن 46 ملین ڈالر نا کمکاری نا منظوری ءِ تسنے۔ دافیصلہ ءِ جہانی بینک انا بورڈ آف ایگزیکٹیو ڈائریکٹرزنا دیوان اٹی کننگا۔ پاکستان اٹ جہانی بینک نا کنٹری ڈائریکٹر ناجی بن حسائن تینا اسہ بیان اسے ٹی پارینے کہ خیبرپختونخوا سٹیزن سنٹرڈ سروس ڈیلیوری پروجیکٹ نا رداٹ خیبرپختونخوا نا اوار مروک ضلع غاتیٹی چناخاص وڑاٹ چنکا چنا و اوفتا لمہ غاتے جان جوڑی نا خذمت آتا فراوانی نا نظام اٹ گچینی اتنگک۔ اوپارے کہ ڈٹ آن جان جوڑی نا بابت خذمت اسکان رسینگ اٹ گچینی اتنگک، ڈٹ آن اِراسال آن کم وئی نا 3 لکھ چناتے فائدہ رسینگک۔ ڈٹ انا رداٹ ہر چنانا خاہوت ءِ پنچ آگاہی سیشن آتیٹی بشخ ہلنگ و چناتا جان جوڑی نا چاروکی آ 12 ہزار 500 روپئی اسکان نا کمک فراوان کننگک۔
