اسلام آباد۔ 10 جولائی (اے پی پی) بنجائی وزیر موسمیاتی بدلی و چاگڑدی رابطہ سینیٹر شیری رحمان ملک انا چندی علاقہ غاتیٹی پِر آن ودی مروک آ گمانی حالیت آتا رداٹ پیشگی تیاری و دمدستی ردعمل ءِ پک کننگ نا گرج آ زور شاغانے۔ دوشنبے نادے آ تینا اسہ ٹویٹ اسے ٹی اوپارے کہ محکمہ موسمیات نا کنڈآن ملک انا چندی بشخ آتیٹی پِر انا پیشگوئی کننگانے ہرانا رداٹ بروک آ 24 آن 48 گھنٹہ ٹی ہورہ و گروک اٹ پِر انا گمان ءِ۔ لاہور، سیالکوٹ و نارووال اٹی شنزہ ئی پِر انا گمان ءِ۔ سندھ، قطب دے ٹکی بلوچستان و خیبرپختونخواہ نا چندی شار تیٹی ہورہ و گروک اٹ پِر و جاگہ جاگہ غا زرس پِر اناگمان ءِ ، بھلا شار تیٹی اربن فلڈنگ و مشی آ علاقہ غاتیٹی لینڈ سلائیڈنگ نا گمان ءِ۔ دریائے چناب، راوی و ستلج اٹی ہم نیامی درجہ آن بڑزکو درجہ نا نوکاپ گمانی ءِ۔ شاری و ضلعی انتظامیہ ءِ پارت کننگانے کہ او شاری ہند آتیٹی نوکاپ نا خطرہ غان دوچار علاقہ غاتیکن ہلہلہ ئی ٹریفک پلان ءِ پک کیر۔ داٹی نوکاپ زہمی انڈرپاسز کن دمدستی وڑاٹ ڈی واٹرنگ آپریشن اوار مرے۔ اوپارے کہ غٹ ضلعی انتظامیہ ءِ دریانا دامون ایمون علاقہ غاتیٹی پیشگی تیاری و دمدستی ردعمل ءِ پک کننگے۔ غٹ تعلقدار ادارہ و سٹیک ہولڈر آتے دمدستی کمکاری ءِ پک کننگ کن فعال رابطہ ءِ بایدے برقرار تخنگے۔ 25 جون آن داتم اسکان پِر انا چندی واقعہ غاتیٹی 68 مرک مس و 79 ہند آتے نسخان رسینگانے۔ شاری و سیل و سواتی تے پارت کننگک کہ او پارت آتیا عمل کیر و خیال تخر۔
