اسلام آباد۔ 10 جولائی (اے پی پی) چیف الیکشن کمشنر پرمان کرینے کہ وزارت داخلہ 12 جولائی اسکان مخصوص نشست آتا کچ انا نوٹیفکیشن و اومیتدار آتیکن گچین خڑچ آتا حد انا رولز آتے ہرحال اٹ الیکشن کمیشن ءِ ایتے تانکہ بنجائی دارالحکومت اسلام آباد اٹی بلدیاتی گچین کاری تا شیڈول ءِ جاری کننگ مرے۔ الیکشن کمیشن آن جاری بیان نا رداٹ چیف الیکشن کمشنر سکندر سلطان راجہ نا کماشی ٹی دوشنبے نادے آ اہم دیوان اس اڈ ہلک ، ہراٹی چیف الیکشن کمشنر و الیکشن کمیشن نا شرفمند آ باسک آتیان بیدس اسپیشل سیکرٹری و ایلو سینئر آفیسر آک بشخ ہلکر۔ دیوان اٹ پاننگاکہ شرفمند آ عدالت عالیہ اسلام آباد نا پرمان ءِ مون آتخسا الیکشن کمیشن بنجائی دارالحکومت اسلام آباد نا بلدیاتی گچین کاری تا اڈتننگ و شیڈول تننگ کن پورو وڑاٹ تیار ءِ، البتہ 22 جون 2023نادیوان اٹی وزارت داخلہ نا نمائندہ غاک مخصوص نشست آتا کچ انا نوٹیفکیشن و اومیتدار آتیکن گچین کاری خڑچ آتا حد اکن رولز جوڑ کننگ کن درخواست کریسس ہراڑا الیکشن کمیشن وزارت داخلہ ءِ ہندا بڑزکو دستاویزآتا تننگ نا پارت کرے ولے داسکان وزارت داخلہ نا کنڈآن ورندی موصول متنے۔
