اسلام آباد۔ 10 جولائی (اے پی پی) وزیر مملکت ہیلتھ سروسز ریگولیشنز اینڈ کوآرڈی نیشن مہیش کمار ملانی پارینے کہ پاکستان و چین نا نیام اٹ مثالی سنگتی نا رشتہ ساڑی ءِ، چین ہر مشکل دور اٹ پاکستان نا کمک ءِ کیک، سی پیک نا رداٹ چین پاکستان اٹ ارب آ ڈالر نا زرکاری کرے، تھرانا اسکول آتیٹی چینی زبان ءِ خوانفنگ انگ ءِ، تھراٹی سی پیک نا سوب آن بھاز زیات شونداری مسنے۔ داخیال آتا درشانی ءِ او بیلٹ اینڈ روڈ انیشیٹیو نا دہ می سال دے انا وخت آ بیجنگ اٹی میڈیا تون گپ وتران کرسا کرے۔ اوپارے کہ چین ہر مشکل دور اٹی پاکستان نا کمک ءِ کیک، خاص وڑاٹ کوویڈ۔ 19 نا دے تیٹی چین پاکستان نا شاندار وڑاٹ کمک ءِ کرے۔ ہندا وڑ تدوک آ سال ہراتم نن نوکاپی حالیت آتون مون تسنہ تو چین ننتون پبی تفے۔ پاکستان ءِ دادے تیٹی بھاز زرگزرانی تنکی مون تروک مسنے، اوٹی ہم چین پاکستان تون پبی تفے۔ اوپارے کہ چین صدر شی جن پنگ نا کماشی ٹی شونداری نا ہرا مزل آتے طے کرینے او بھاز سفت نا قابل ءُ۔ چین نا شونداری نا بھرمک ملک انا طول و عرض اٹی غٹ الس نا نیام اٹ بریبر تقسیم مننگ ءُ ، ہندا حقی شونداری ءِ۔ رمیش کمار ملانی پارے کہ چین نا دا جوانی ءِ کہ دا جیت جیت کمکاری نا رداٹ غٹ بنی نوع انسان نا اسیجائی شونداری نا است خواہی تخک و بیلٹ اینڈ روڈ انیشیٹو دانا اسہ اہم ءُ درور اسے۔ چین پاک اقتصادی راہداری بیلٹ اینڈ روڈ انیشیٹو نا رداٹ اسہ مثالی ءُ ڈٹ اسے۔ دا ڈٹ اٹ چین ارب آ ڈالر نا زرکاری کرے۔ اوپیدواری کرے کہ اوناگچین کاری حلقہ تھر اٹی سی پیک نا سوب آن بھاز شونداری مسنے ۔ تھرانا کولااینو’’بلیک گولڈ‘‘ پاننگک مخلوق ءِ روزگار، جان جوڑی و تعلیم نا اسہ وڑ وارخواہی دوبسنے۔
