اسلام آباد۔ 07 جولائی(اے پی پی) بنجائی وزیر حوالکاری و شینکاری مریم اورنگزیب پارینے کہ وزیراعظم محمد شہباز شریف قائد نواز شریف نا ورناتے آخبت نا جوڑ کننگ و اوفتے شونداری آن ہمکنار کننگ نا وژن آ ولداآن عملدرآمد نا بناءِ کرینے، علم اتون مہرومریبت کروک آ ورناتیٹی اسہ لکھ لیپ ٹاپ نا بشخنگ نا اینوآن ولدا دا دعاتون بنامننگ ءِ کہ ’’نوجوان ترقی کا چھولیں آسماں‘‘ ۔ جمعہ نادے آ تینا اسہ ٹویٹ اسے ٹی بنجائی وزیر حوالکاری و شینکاری پارے کہ دا ہمو پروگرام ءِ ہرادے فتنہ، پھسات و بے چیٹی نا ڈٹ ساز ’’سیاسی رشوت ‘‘ پارسا علم دشمنی کریسس۔ اوپارے کہ دا پروگرام ورناچین ءِ پوسکن آٹیکنالوجی ، تعلیم، کسب آن آراستہ کننگ، روزگار ، کاروبار کن سرمایہ فراوان کننگ، جان جوڑ جوڑ کننگ کن گوازی و مثبت سرجزآتیٹی شمولیت نا روشنائی ءِ ہرادا مون آ سوچ ءِ چٹفک ہرا ورناتے کہینگ، خلنگ، ہُشنگ نا کنڈا ہشکا ایتک، تینا ناپاک عزم اکن ورناتا دوٹی لیپ ٹاپ نا جاگہ غا پیٹرول بمب ، توفک، ربڑ، خل و لٹ ایتک، ماڑی، قومی ادارہ غاتیا جلہو، شہید آتا یات گار آتا بے شرفی ءِکرفک۔
