اسلام آباد۔ 07 جولائی (اے پی پی) وزیراعظم محمد شہباز شریف پارینے کہ ورناک قوم انا آخبت و شونہالی نا ضمانت ءُ، است خواہک کہ ہر چناڑتون لیپ ٹاپ مرے و اسہ لکھ آخا اسہ کروڑ لیپ ٹاپ بشخیو، ورناتیا زرکاری آن ود ہچ اس اف۔ داخیال آتا درشانی ءِ او جمعہ نادے آ جناح کنونشن سینٹر اٹ وزیراعظم یوتھ پروگرام نا رداٹ لیپ ٹاپ بشخنگ نا دود آن تران کرسا کرے۔ بنجائی وزیر حوالکاری و شینکاری مریم اورنگزیب ، وزیراعظم نا خصوصی کمکار شنرہ فاطمہ، عطاتارڑ،ملک احمد خان آن بیدس چیئرمین ایچ ای سی، استاد، لمہ و باوہ و طالب علم آک بھلو کچ اسے ٹی ساڑی ئسر۔ وزیراعظم پارے کہ ہراتم ای خادم پنجاب ئسٹ تو ورناتیٹی لکھ آ لیپ تاپ آتےبشخاٹ۔ پنجاب ایجوکیشن انڈوومنٹ فنڈ آن بے شمار طالب علم آتے تعلیمی وظیفہ فراوان کننگ نا چرجوئی نا بناءِ کرین اوفتیان بھاز انگا طالب علم آک اینوڈاکٹر، انجینئر و سرسہب پروفیشنلزجوڑ مسنو و پاکستان نا خذمت ءِ کننگ ءُ۔ اوپارے کہ اسہ دے اس لاہور اٹی اسہ چناس لیپ ٹاپ ہلسا کنے پارے کہ اونا لمہ و باوہ دادنیا ٹی افس ولے او ڈاکٹر اس جوڑ مننگ خواہک ۔ وزیراعظم پارے کہ قوم انا روشنا آخبت نا کنجی ورناتا دوٹی ءِ۔ کنا است خواہک کہ ہرورنانا دوٹی لیپ ٹاپ ایتیو۔ کوویڈ۔ 19 نا جہانی دین بس تو درسگاک بند مسر۔ دالیپ ٹاپ ہی ئس ہرا ورناتے تعلیم نا زیور آن شپ کننگ و سرسہب پروفیشنل مننگ نا ذریعہ جوڑ مس۔ پوسکن آ دور انا خواست آتا رداٹ قوم انا ہر چنا ہراڑتون علم ارے و خواری کننگ خواہک اودے تینا لیپ ٹاپ ایتنہ۔ دا لیپ ٹاپ لکھ آ ورناتے روزگار کٹیا کنننگ نا قابل جوڑ کننگ نا ذریعہ ہم جوڑ مسنے۔ بروک آ اسہ سال اٹی ورناتیٹی اسہ لکھ لیپ ٹاپ بشخنگک داڑکن بجٹ اٹ زر جتا کننگانے۔
