اسلام آباد۔ 07 جولائی (اے پی پی) بنجائی وزیر حوالکاری و شینکاری مریم اورنگزیب پارینے کہ مچ آ ملک انا پریس کلب آتے پوسکن آ خواست آتون ہم گرنچ کننگ کن وزارت حوالکاری تینا اہم کڑد ءِ ادا کرسا کیک۔ داہیت ءِ او ایبٹ آباد پریس کلب ناصدر راجہ ہارون و سیکرٹری جنرل راجہ منیرنا کماشی ٹی صحافی تا ڈل اتون اوڑدہی ٹی گپ وتران کرسا پارے۔ داوخت آ بنجائی وزیر پارلیمانی امور مرتضیٰ جاوید عباسی ہم ساڑی ئسک۔ ڈل بنجائی وزیر حوالکاری ءِ مون تروک مشکل آتا بارواٹی معلومدار کرے۔ داوخت آ گپ وتران کرسا بنجائی وزیر حوالکاری پارے کہ حکومت آجوئی صحافت آ پورو یخین تخک۔ اوپارے کہ ایبٹ آباد پریس کلب نا شمار ملک انا اہم و زموار پریس کلب آتیٹی مریک۔ بنجائی وزیر حوالکاری ایبٹ آباد پریس کلب اٹی دمدستی وڑاٹ کمپیوٹر لیب و اسٹوڈیو نا جوڑ کننگ نا پارت کرے۔ اوپارے کہ ایبٹ آباد پریس کلب ءِ پڑو کروک گرانٹ ہم فراوان کننگک۔ اوپارے کہ صحافی تا ویل آتے ایسر کننگ ننا اولیت ءِ۔ داوخت آ بنجائی وزیر پارلیمانی امور مرتضیٰ جاوید عباسی ایبٹ آباد پریس کلب کن کمپیوٹر لیب، سٹوڈیو نا جوڑ کننگ و گرانٹ نا فراوانی نا پڑو آ بنجائی وزیر حوالکاری نا منت واری ءِ ہرفسا پارے کہ ایبٹ آباد نا صحافتی برادری کچ اٹنگا وسیلہ غاتیان پد ہم تینا کسبی خذمت آتے سرتننگ ءُ۔ صحافی تا ڈل بنجائی وزیر حوالکاری مریم اورنگزیب و بنجائی وزیر پارلیمانی امور مرتضیٰ جاوید عباسی نا منت واری ءِ ہرفے۔
