وزیراعظم شہباز شریف تورغر۔ بونیر شاہراہ ، بونیر۔کڑاکڑرابطہ سرنگ و تورغیربونیر آر۔سی ۔سی پول انا بنداو ءِ تخا

تورغر۔ 06 جولائی (اے پی پی) وزیراعظم محمد شہباز شریف تورغر۔بونیرشاہراہ، بونیر۔کڑاکڑ رابطہ سرنگ و تورغربونیر آر۔سی ۔سی پول انا بنداو ءِ تخا۔ پنچ شنبے نادے آ وزیراعظم محمد شہباز شریف خیبرپختونخوانا ضلع تورغرنا دورہ ءِ کرے۔ وزیراعظم ءِ تورغرنا چندی شونداری ڈٹ آتا بارواٹی حوال تننگا۔ وزیراعظم تورغر۔ بونیر شاہراہ، بونیر۔ کڑاکڑ رابطہ سرنگ و تورغربونیرآر۔سی ۔سی پول انا بنداو ءِ تخا۔ وزیراعظم محمد شہباز شریف تون داوخت آ ہندی قبائلی سرکڑدہ و سلاہکار آک اوڑدہی کریر۔ بنجائی وزیر حوالکاری مریم اورنگزیب، سلاہکار وزیراعظم انجینئر امیر مقام و کیپٹن (ر) صفدر ہم داوخت آ ساڑی ئسر۔ سرکڑدہ غاتون گپ وتران کرسا وزیراعظم پارے کہ ضلع تورغراٹی سڑک، پول و ایلو ڈٹ آتا بنداو ءِ تخنگ آن ضلع تورغر اٹی شونداری نا پوسکن آ دور بناکیک۔ اوپارے کہ مسکوہی وزیراعظم محمد نواز شریف تینا دور اٹی داڑے تاریخی ڈٹ آتا بناءِ کرے۔ تدوک آ حکومت دا ڈٹ آتے سردخانہ ٹی شاغاسس۔ نواز شریف نا ڈٹ آتے مون آدننگک۔ بجٹ اٹ دا ڈٹ آتیکن زر جتا کننگانے۔ بنجائی حکومت ڈٹ آتا پوروی کن صوبہ نا کمک ءِ کیک۔ وزیراعظم ءِ بونیر اٹی ہم چندی شونداری ڈٹ آتا بارواٹی حوال تننگا۔ وزیراعظم محمد شہباز شریف پارت کرے کہ بونیر و تورغرنا شونداری ڈٹ آتیا کاریم نا رفتار ءِ ترند کننگے و اوفتے اولیتی بنداو تیا پورو کننگے۔ دا شونداری ڈٹ آتیا دے و نن کاریم کننگے و آب و شفافیت آ ہچ ءُ سمجھوتہ اس کننگپ۔