روپئی نا قدر اٹی گچینی، اسٹاک ایکسچینج اٹی کاروبار اٹی ودکی، افراط زر انا کچ اٹی کمتی، زرگزران نا گچینی کن حکومتی گام گیج آتا بھرم تا بننگ بناکرینے، بنجائی وزیر خزانہ

اسلام آباد۔ 03 جولائی (اے پی پی) بنجائی وزیر خزانہ سینیٹر محمد اسحاق ڈار پارینے کہ اوپن مارکیٹ اٹی روپئی نا  مقابلہ ٹی ڈالر نا نہاد 270 آن 272 روپئی اسکان بسنے۔ دوشنبے نادے آ سینیٹر محمد اسحاق ڈار تینا ٹویٹ ٹی پارے کہ ڈالر نا مقابلہ ٹی روپئی نا قدر اٹی گچینی بننگ ءِ۔ اوقوم ءِ مبارکبادی ترسا پارے کہ پاکستان اسٹاک ایکسچینج اٹی کاروبار نا اولیکو دے 2334 پوائنٹ آتا ودکی مس، مئی نا مقابلہ ٹی جون اٹی افراط زر انا کچ 29.4 درسد اسکان بس۔ اوپارے کہ دا کچ مئی 2023 اٹی 38 درسد ریکارڈ کننگاسس۔ بنجائی وزیر خزانہ پارے ک حکومت زرگزران نا گچینی کن اولیتی بنداو تیا گام گیج کننگ اٹی ءِ ہرافتا بھرم نا بننگ بناکرینے۔