اسلام آباد۔ 21 جون (اے پی پی) وزیراعظم محمد شہباز شریف پارینے کہ تہہ و پیشن نا عوامل آتا سوب آن ودی مروک آ زرگزرانی چیلنج آتا رداٹ پاکستان ءِ خصوصی زرکاری آسراتی کونسل کون آ نمائندہ فورم نا گرج بھلو وخت اسے آن محسوس کننگاکہ، زرگزرانی پالیسی جوڑ کننگ، سنگت ملک آتیان زرکاری ءِ اتنگ کن اسپیشل انوسٹمنٹ فیسیلی ٹیشن کونسل نا جوڑ کننگ نا فیصلہ ءِ کننگانے، کونسل نا دمدستی ہدف پیشن نا براہ راست زرکاری ءِ 5 بلین ڈالر اسکان ودفنگ ءِ، دا کونسل زرگزران نا پنجر اٹ بنداوی اصلاحات ءِ مون آ دننگ کن فیصلہ سازی نا اسہ بڑزکو فورم اسے نا وڑاٹ کاریم کیک۔ چارشنبے نادے آتینا ٹویٹ اٹی وزیراعظم پارے کہ ملک ءِ زرگزرانی چیلنج آتیان کشسا پائیدار شونداری نا کنڈا درینن، سیوتی حکومت زرگزرانی پالیسی جوڑ کننگ نا مینڈیٹ اتون اسہ اسپیشل انوسٹمنٹ فیسیلی ٹیشن کونسل (ایس آئی ایف سی ) جوڑ کننگ نا فیصلہ کرینے، ہرا زرگزران نا بحالی کن پالیسی ٹی راہشونی ، تسلسل و گچین نفاذ ءِ پک کیک۔ وزیراعظم پارے کہ تینا ساخت انا سوب آن کونسل زرگزران نا پنجر اٹ بنداوی اصلاحات ءِ مون آ دننگ کن فیصلہ سازی نا اسہ بڑزکو فورم اسے نا وڑاٹ کاریم کیک۔ فورم آئی ٹی، کشت وکشار، توانائی، معدنیات و کانڑ کنی و دفاعی پیدوار کون آاہم بشخ کون آتیا چکار تخک۔ اوپارے کہ سنگت ملک آتیان زرکاری ءِ اتنگ کونسل نا اہم مسخت آتیان اسٹ ءِ۔ دمدستی ہدف پیشن نا براہ راست زرکاری ءِ5 بلین ڈالر اسکان ودفنگ ءِ۔ وزیراعظم پارے کہ تہہ و پیشن عوامل آتا سوب آن ودی مروک آ زرگزرانی چیلنج آتا رداٹ کونسل کون آ نمائندہ فورم نا گرج بھلو وخت اسے آن محسوس کننگاکہ، ہمہ پلو ویل آتون مون تننگ کن نصابی کتاب نا وڑوڈول داسہ قابل عمل اف۔ ہنداسوب آن زرگزران ءِ خودانحصاری، برآمد آتیا تالان و سوگو، پیشن نا لوڈو و ہلچل ءِ سگنگ کن قابل جوڑ کننگ کن اجتماعی حکمت عملی آن فائدہ ہرفنگ ناپین زیات گرج ءِ۔ وزیراعظم پارے کہ ننا ویل آتا ایسر تخلیقی حالیت آتیٹی تخوک ءِ۔
