اسلام آباد۔ 21 جون (اے پی پی ) وزیراعظم محمد شہباز شریف پارینے کہ جہانی مالیاتی پنجر نا اصلاحات بھلو وخت اسے آن اسہ اہم ءُ خواست اس مسنے، دا نظام ءِ نمائندہ و مساوی جوڑ کننگ کن داڑا نظرثانی نا گرج ءِ، فرانس نا دورہ ٹی انسانیت ءِ مون تروک ساڑی چیلنج آتون مون تننگ کن جہانی مالیاتی ادارہ غاتا تنظیم نو نا گرج آ پاکستان نا موقف ءِ تخیوہ۔ چارشنبے نادے آ تینا ٹویٹ اٹی اوپارے کہ جہانی مالیاتی پنجر نا اصلاحات بھلو وخت اسے آن اسہ اہم ءُ خواست اس مسنے ہرا السی پالیسی نا چاہندار، پالیسی پریکٹیشنرز و جہانی راہشون تا کنڈآن چندی فورم تیا کننگانے۔ اوپارے کہ موسمیاتی بدلی، قدرتی آفت، چاگڑد، وام تا ودوک آ کہول و توانائی نا گدریفنگ کون آ چیلنج آتا سنگین نوعیت خطرہ نا گھنٹی اس خلکنے۔ ویل آتا عالمگیریت جہانی مالیاتی نظام ءِ نمائندہ و مساوی جوڑ کننگ کن داڑا نظرثانی کننگ کن تخلیقی نقطہ نظر نا گرج ءِ ودی کرینے۔ وزیراعظم پارے کہ دا ہموجاگہ ءِ ہراڑے فرانس اٹی نیو گلوبل فنانسنگ پیکٹ سمٹ دنیا کن اسہ یکتا ءُ موقع سے نا نمائندگی ءِ کیک کہ او یکجا مریر و جہانی مالیاتی نظام اصلاحات کن درکار گیشتر اصول و گام گیج آتیا متفق مریر۔ وزیراعظم پارے کہ تینا دورہ ءِ فرانس اٹی انسانیت ءِ مون تروک ساڑی چیلنج آتون مون تننگ کن جہانی مالیاتی ادارہ غاتا تنظیم نونا گرج آ پاکستان نا موقف ءِپیش کیوہ ۔ جی۔ 77 پلس چائنا گروپنگ اٹ اسہ اہم ءُ اسٹیک ہولڈر اسے نا وڑاٹ و موسمیاتی بدلی نا خطرہ غان بھاز بے وڑ زہمی مروک آ ملک انا وڑاٹ پاکستان داکڑد اکن گچین پوزیشن اٹی ءِ۔
