کراچی۔ 21 جون (اے پی پی) پی پی پی شعبہ زالبول نا مرکزی صدر و سندھ اسمبلی نا باسک فریال تالپور پارینے کہ شہید گودی بینظیر بھٹو تینا سیاسی تدبر و فلسفہ ، لازوال جہد و بے مٹ قربانی تا سوب آن الس نا است و تاریخ اٹی مدام زندہ و جاوید سلک۔ اوشہید گودی بینظیر بھٹو نا ودی دے آ جاری تینا کلہواٹی پارے کہ شہید گودی بینظیر بھٹو کون آ نرزور، زیرک و تاریخ ساز راہشون پیڑی تیٹی ودی مریک۔ اومچ آدنیا ٹی ساڑی جیالہ غاتون اوار مچ آ قوم ءِ شہید گودی بینظیر بھٹو نا ودی دے آ مبارکبادی ترسا پارے کہ شہید گودی بینظیر بھٹو بھاز اختہ و مشکل ءُ زند اس گدریفنگ آن پد ہم ہراوڑ اسہ مسڑ، زائیفہ ، لمہ و لیڈر نا کڑد ءِ ادا کرے، او اسہ روشناءُ درور اسے۔ اوپارے کہ شہید گودی بینظیر بھٹو ہر بابت ننکن اسہ استاد اسے نا کڑد ءِ ادا کرے، ننے الس نا حق اکن جنگ و اوفتا خاطر ہروڑنا قربانی تننگ کن ہیل تس، شہید گودی بینظیر بھٹو ننے تینا کاز آن ثابت گام مننگ ہیل تس۔ اوپارے کہ زندہ قومک تینا لیڈرآتے اسُل است آن دپسہ، پاکستانی الس ہم ہردے شہید گودی بینظیر بھٹو ءِ یات و اونا کمتی ءِ محسوس کیک۔ اومستی پارے کہ دا مچ آ قوم اکن است جمی نا سوب ءِ کہ چیئرمین بلاول بھٹو زرداری اینو شہید گودی بینظیر بھٹو نا مشن نا بیرک ءِ ہرفسا الس نا شونہالی و پاکستان نا سربلندی کن سرگرم ءِ۔
