اسلام آباد۔ 20 جون (اے پی پی) وزیراعظم محمد شہباز شریف پاکستان سویٹ ہوم تے ٹرانسپورٹ وین تا عطیہ پیش کرے۔ سے شنبے نادے آ وزیراعظم ٹرانسپورٹ وین تا چابی تے پاکستان سویٹ ہوم تا چیئرپرسن زمرد خان نا دوٹی تس ۔ داوخت آ وزیراعظم پاکستان سویٹ ہوم کیڈٹ کالج اٹی خوانوک آ چناتتون گپ وتران کرسا پارے کہ زمردخان ہرازمواری ءِ ہرفینے اللہ تعالیٰ اودے اونا اجر ءِ عطاکے۔ اوچناتے پارے کہ او خواری اٹ تعلیم دوئی کیر و قوم انا عظیم جوڑ کروک جوڑ مریر، نم پاکستان نا آخبت اورے۔ داوخت آ زمردخان وزیراعظم نا منت واری ءِ ہرفے۔ بنجائی وزیر داخلہ رانا ثناء اللہ و مسلم لیگ (ن) نا ایلو راہشونک ہم داوخت آ ساڑی ئسر۔ وزیراعظم نا کنڈآن پاکستان سویٹ ہوم تے 4 گاڈی عطیہ کننگا ہرافتا مالیت 6 کروڑ20 لکھ روپئی ءِ۔ وزیراعظم داخت آ چناتتون وین اٹی سوار مرسا چناتا است بڈی ءِ کرے۔ اوچناتے پارے کہ او تعلیم دوئی کرسا ملک و قوم انا خذمت ءِ کیر ، انجینئر، ڈاکٹر ، سائنس دان ، کشاری و آئی ٹی نا چاہندار جوڑمریر وپاکستان نا خذمت ءِ کیر، ننے اواری اٹ پاکستان ءِ سہی وڑاٹ قائد نا پاکستان جوڑ کروئی ءِ۔ داوخت آ چناتا خوشی دیدنی ئسک، چناک پاکستان و وزیراعظم زندہ باد نا فلک شگاف نعرہ خلکر۔
