اسلام آباد۔ 20 جون (اے پی پی) وزیراعظم محمد شہباز شریف مارگلہ ایونیو ڈٹ انا بناءِ کرے، 10.4 کلومیٹر شاہراہ جی ٹی روڈ آن اسلام آباد آ بروک آتے اسہ گیگ بدل کسر اس فراوان کیک، دا شاہراہ سنگجانی آن ڈی 12 اسکان مریک، دا ڈٹ آ 2 ارب 69 کروڑ 91 لکھ روپئی خڑچ بسنے۔ سے شنبے نادے آوزیراعظم محمد شہباز شریف دا ڈٹ انا باضابطہ بناءِ کرے۔ داوخت آ بنجائی وزیر داخلہ رانا ثناء اللہ ، مسکوہی قومی اسمبلی نا باسک محمد حنیف عباسی، ڈاکٹر طارق فضل چوہدری، انجم عقیل خان آن بیدس مسلم لیگ (ن) راولپنڈی نا راہشونک ہم ساڑی ئسر۔ وزیراعظم ءِ داوخت آ حوال ترسا پاننگاکہ دا ڈٹ انا بناجون 2021 اٹی کننگا۔ دسمبر 2022 اٹی دانا بنداو ءِ تخنگا، دا ڈٹ اٹی شاہ اللہ دتہ نا ہند آ اسہ انڈرپاس اس اوار کننگا ہرانا سوب آن دانا خڑچ و پوروی نا مد اٹی بدلی بس، دا شاہراہ غان جی ٹی روڈ سنگجانی آن ڈی 12 اسکان نا سفر کم مرسا منہ منٹ اس سلیس، دانا سوب آن سری نگرہائی وے آ ٹریفک نا ہن و بر کم مس، ہندی لیبر و تعمیراتی مواد نا بابت انڈسٹری ءِ مون آ دننگا، داشاہراہ غان دا علاقہ نا مخلوق ہم فائدہ ہرفک،دا شاہراہ نا چارمہ کنڈ سی ڈی اے نا کنڈآن شجرکاری ہم کننگانے۔ داوخت آ وزیراعظم ءِ دا ڈٹ انا ماڈل اس پیش کننگا۔
