اسلام آباد۔ 20 جون (اے پی پی) وزیراعظم محمد شہباز شریف پارینے کہ خواری و عزم اٹ قائد نا پاکستان شونداری نا مزل آتے طے کیک، تدوک آ دور اٹی پاکستان اٹی شونداری نا سفرسلوک ئس، سی پیک ڈٹ آ بے گرج تنقید کننگا ، چین، سعودی عرب، متحدہ عرب امارات و قطر ہر مشکل وخت اٹی پاکستان تون تفیر، نواز شریف پاکستان ءِ دہشت گردی و لوڈشیڈنگ آن نجات ترفے، پاکستان ءِ بڑزی تیا دننگ ناسفر مشکل ضرور ارے ولے اختلاف آتے چٹفسا نن قوم ءِ عظیم جوڑ کینہ۔داخیال آتا درشانی ءِ او سے شنبے نادے آ مارگلہ ایونیو نا بنائی دود آن تران کرسا کرے۔ وزیراعظم شہباز شریف پارے کہ مارگلہ ایونیو، 20 ارب روپئی نا خلقی شونداری و شونہالی نا پیکج و سویٹ ہوم تیکن کوچز اسلام آباد و ایلو علاقہ غاتا شونداری و شونہالی کن گام گیج کننگ انگ ءِ، مستین نا سست روی و مجرمانہ ڈیوالئی آن اسلام آباد نا شاریک دا ڈٹ آتیان کیہی سال محروم ئسر، پاکستان ءِ نزور و ڈی ریل کننگ نا سازش کننگا، 9 مئی آ اوفتا سازش و ملک دشمنی کاٹم آن گدرینگا و ہموکاریم مس ہراڑا دشمن سجفنگ ہم کتوکہ۔ اوپارے کہ چیئرمین سی ڈی اے و حنیف عباسی تون اوار مسلم لیگ (ن) نا سرکڑدہ دے و نن خواری کریر اوڑا اوفتے مبارکبادی ایتنہ، دا خذمت نا ہندن ءُ زمواری اس ہرفینو ہرانا الس سال آتیان چاری ئسر، نواز شریف نا دور انا ایسری آن پد شونداری نا سفر سلیس، این ایل سی و ایف ڈبلیواو ءِ شاری علاقہ غاتیٹی سڑک جوڑ کننگ نا موکل کنا وزارت اعلیٰ نا دور اٹی ملا۔ مارگلہ ایونیو نا بنائی دود اٹی چیئرمین سی ڈی اے نور الامین مینگل دا ڈٹ انا بابت حوال ترسا پارے کہ مارگلہ ایونیو جاڑ انگا شارتیکن ءِ ، دا ڈٹ سی ڈی اے و این ایچ اے نا اسیجائی ءِ، داوخت آ سی ڈی اے 100 ارب روپئی نا انفراسٹرکچر و پوسکن آ سیکٹرآتا ڈویلپمنٹ نا ڈٹ آتیا عمل کننگ ءِ وخت اس کہ اولیکو وار 20 ارب روپئی نا خلقی علاقہ غاتا شونداری پیکج ہم داٹی اوار ءِ۔ داوخت آ پاکستان سویٹ ہوم تا بلوچستان آن تعلق تخوک آ آصف وزیراعظم نا منت واری ءِ ہرفے۔ مسکوہی قومی اسمبلی نا باسک حنیف عباسی تران کرسا پارے کہ مچ آ دنیا شہباز شریف نا لائخی تے مننگ ءِ، پاکستان ءِ جمہوریت ، اسلام و بدلی نا پن آ پُلنگا، مسلم لیگ (ن) 10 ہزار میگاواٹ بجلی ودی کرسا داجاگہ نا تہاری تے چٹفے۔ وزیرداخلہ رانا ثناء اللہ پارےکہ 2023اٹی ن لیگ ملک آن لوڈشیڈنگ و دہشت گردی ءِ چٹفے، مار آن تنخواہ ہلپننگ آ محمد نواز شریف ءِ ہمیشہ کن نابود کننگا، وزیراعظم شہباز شریف ملک ءِ دُوارہ شونداری نا کنڈادرے۔ وزیراعظم داوخت آ سکندر اعظم روڈ انا پوسکن تفنگ و ودکی نا ڈٹ انا بنداو ءِ تخا۔
