اسلام آباد۔ 20 جون (اے پی پی) صدر مملکت ڈاکٹر عارف علوی پارینے کہ پناہ گزین تا جہانی دے لکھ آ اوغان باہوٹ آتا مہمانداری ٹی پاکستان نا تدوک آ 40 سال انا نمان کڑد انا یات ترفک، کچ اٹ وسیلہ غاتیان پد ہم بھلو کچ اسے ٹی بے اُرا بندغ آتے پناہ تننگ ننا ایلمی و ہمدردی نا شاہدی ءِ۔ ایوان صدر نا پریس ونگ آن جاری بیان نا رداٹ صدر مملکت سے شنبے ناد ے آ پناہ گزین تا جہانی دے انا وخت آ تینا کلہو اٹی پارے کہ پاکستان دنیا ٹی پناہ گزین تا اسہ بھلو آبادی اسے نا مہماندار ءِ، پاکستان چیلنج و کم وسیلہ غاتیان پد ہم است انا حب اٹ پناہ گزین تا کمک ءِ کرے۔ اوپارے کہ اوغان باہوٹ آتا مہمانداری نا بھاریم ءِ بشخنگ کن بنائی وڑاٹ پاکستان ءِ جہانی برادری نا کنڈآن مالی کمک ملا، وخت اتون امداد کم مننگ آن پد ہم مہاجرآتا راجی آسودہی و رضاکارانہ پدی نا پاکستان نا عزم غیر متزلزل ءِ۔ صدر مملکت پارے کہ 40 سال گدرینگ انگ آن پد ہم مہاجر و ہندی بندغ آتا نیام اٹ ہچ ءُ ناخوشگوار واقعہ اس متنے، پاکستان تینا کنڈآن پناہ گزین تے ہرممکن کمک فراوان کرے۔ ڈاکٹر عارف علوی پارے کہ پاکستان پناہ گزین تیکن باوقار زند انا پوسکن جوڑ کننگ کن گام گیج کرے و او اقوام متحدہ نا ہائی کمشنر مہاجرین تون اوار آسودہی ادارہ غاتون کاریم کرسا کرینے۔ صدر مملکت پارے کہ پاکستانی سیم تا تہہ ٹی رہینگوک پناہ گزین تے امداد و رکھ فراوان کننگ کن کوشست کننگ ءِ، پاکستان اوغان باہوٹ آتے علم و کسب آن آراستہ کننگ کن جامع تعلیمی پروگرام درستی راستی کرفینے، پاکستان داہیت ءِ پک کرے کہ پناہ گزین چناتے آب اٹ تعلیم اسکان رسینگ دوئی مرے۔ صدر کمک فراوان کننگ آ جہانی تنظیم و غٹ بندغ آتا است انا حب اٹ منت واری ءِ ہرفسا پارے کہ رحم دلی، ہمدردی و شمولیت نا قدرننا درستی راستی ءِ۔
