اسلام آباد۔ 20 جون (اے پی پی) صدر مملکت ڈاکٹر عارف علوی واپار اٹی ودکی کن اقتصادی سفارتکاری آ چکار کننگ نا گرج آ زور شاغسا پارینے کہ برآمد و درملکی زرکاری ءِ ودفسا پاکستان زرگزرانی چیلنج آتا مون ءِ توننگ کیک۔ ایوان صدر نا پریس ونگ آن سے شنبے نادے آ جاری بیان نا رداٹ صدر مملکت داخیا ل آتا درشانیءِ ڈنمارک و روانڈا کن پاکستان نا پندار سفیر آتون اوڑدہی ٹی گپ وتران کرسا کرے۔ اوپارے کہ ملکی برآمد آتے ودفنگ کن اقتصادی و واپاری سفارت کاری آ چکار کروئی مریک۔ صدر مملکت تون ڈنمارک اٹی پاکستان نا پندار سفیر شعیب سرور اوڑدہی کرے۔ صدر پارے کہ پندار سفیر ملکی برآمد آتے ودفنگ کن اقتصادی سفارت کاری آ چکار کے۔ صدر مملکت پارے کہ ڈیری و کشت وکشار نا بشخ آتیٹی ڈنمارک نا کمپنی تے زرکاری نا سلہ خلنگ مریک، انفارمیشن ٹیکنالوجی ہم کمکاری ءِ ودفنگ کن اسہ اہم ءُ بشخ اسے۔ اوپارے کہ پندار سفیر ڈنمارک نا ہوائی توانائی نا کمپنی تے پاکستان اٹ زرکاری کن بٹنگے، پندار سفیر قابل تجدید توانائی نا بشخ اٹی کمکاری ءِ پین ودفنگ کن کاریم کے۔ صدر مملکت اومیت ظاہر کرے کہ وزارتی کہول آ ساڑی آ ہن و بر آن ہڑتوم آ ملک آتا نیام اٹ تین پہ تینی فائدہ مند تعلقداری پین سوگو مریک۔ صدر ڈاکٹر عارف علوی تون روانڈاٹی پاکستان نا پندار ہائی کمشنر نعیم اللہ خان ہم اوڑدہی کرے۔ داوخت آ گپ و تران کرسا صدر مملکت پارے کہ پاکستان روانڈا تون تعلقداری تے بھاز اہمیت ایتک، ہڑتوم آ ملک آتیٹی خوشگوار تعلقداری ءِ۔
