اسلام آباد۔ 20 جون (اے پی پی) وزیراعظم شہباز شریف فرانسیسی صدر ایمانوئل میکرون نا سلہ غا پیرس اٹی اڈ ہلوک آ نیو گلوبل فنانسنگ پیکٹ سمٹ اٹی بشخ ہلنگ کن 22 آن 23 جون اسکان فرانس نا سرکاری دورہ ءِ کیک۔ دفترخارجہ نا ترجمان نا کنڈآن سے شنبے نادے آ جاری بیان نا رداٹ سروک دیوان راہشون تے اسہ پوسکن ءُ گلوبل آرکیٹیکچر نا دروشم آ گپ وتران کننگ نا موقع اس فراوان کیک ہرا پائیدار شونداری، چاگڑد، توانائی نا گدریفنگ و موسمیاتی بدلی نا ایجنڈا نا مایل کمکاری نا چیلنج آتا مقابلہ ءِ کننگ نا لائخی تخک۔ بیان نا رداٹ سروک دیوان نا مسخت بروک آ اِراسال اٹی ایلو اہم جہانی دود و کانفرنس آتا چرجوئی ٹی جہانی مالیاتی نظام نا جوان اصلاحات کن درکار اصول و گام گیج آتا وضاحت کننگ و قطب و سویل نا نیام اٹ زیات متوازن و انصاف اٹ شریداری نا کسر ءِ آوار کننگ ءِ۔ پاکستان جہانی شرہ ٹی اسہ سرکڑدہ سٹیک ہولڈر، جی ۔ 77 اینڈ چائنا ٹی اسہ راہشون و موسمیاتی بدلی تیان غٹ آن زیات زہمی مروک آ غٹ آن بھلا پدتموک ملک آتیان اسٹ نا وڑاٹ سروک دیوان اٹی مروک آ شرہ ٹی بشخ ہلیک۔ وزیراعظم شرہ ٹی جہانی مالیاتی ادارہ غاتیٹی اصلاحات، موسمیاتی فنانس، گرین انفراسٹرکچر، ایس ڈی جیز نا دوئی کننگ و وام تا بابت ایسری نا بابت پاکستان نانقطہ نظر و سلاہ پیش کیک۔ وزیراعظم سروک دیوان نا وخت آ ایلو جہانی راہشون تتون اوڑدہی ہم کیک۔
