اسلام آباد۔ 19 جون (اے پی پی) پاکستان و ایران نا ہڑتوم آ کنڈآتا سیاسی سلابت نا 12 می دور تہران اٹی اڈ ہلک۔ دوشنبے نادے آ دفتر خارجہ نا رداٹ سیکرٹری خارجہ ڈاکٹر اسد مجید خان و ایران نا نائب وزیرخارجہ علی باغیری کنی ہڑتوم آملک آتا کماشی ءِ کریر۔ اوڑدہی ٹی پاکستان نا سفیر رحیم حیات قریشی و ہڑتوم آکنڈآتاایلو بڑزکو کمامدارآک ہم ساڑی ئسر۔ فریق آک ہڑتوم آ کنڈآتا تعلقداری ناغٹ کاریم نا دنگ آتیا گپ وتران کریر و تدوک آ دیوان نا فیصلہ غاتیا عملدرآمد نا حالیت آتا جاچ ءِ ہلکر۔ ہڑتوم آ کنڈآتا واپار ءِ ودفنگ، گیشتر کننگ و توانائی، ٹرانسپورٹ رابطہ، تعلیم و الس تون الس نا ہن و بر اٹی کمکاری ءِ ودفنگ آ امنا کننگا فریق آک علاقائی حالیت آتیا سرجمی اٹ گپ وتران کریر و تین پہ تینی است خواہی نا بشخ آتیٹی خڑکی کمکاری ءِ مون آ دننگ کن اسیجائی اقتصادی کمیشن و اسیجائی واپاری کمیٹی اسے تون اوار چندی ادارہ جاتی میکانزم نا باقاعدہ دیوان نا اہمیت آ زور شاغار۔ فریق آک اقوام متحدہ، او آئی سی و ای سی او تون اوار کثیر الجہتی فورم تیا کمکاری ءِ برجاتخنگ و اسیجائی گڑتی نا جہانی و علاقائی ویل آتیا گپ وتران ءِ سوگو کننگ نا تینا عزم انا درشانی ءِ کریر۔ سیکرٹری خارجہ ایران و سعودی عرب نا نیام اٹ سفارتی تعلقداری تے مست انا وڑآ اتنگ نا ستاءِ کرے۔ اوتینا ایرانی ہم منصب ءِ بھارت نا غیرکانودی کوزہ ٹی جموں وکشمیر اٹی انسانی حق انا بھلا خلاف ورزی تا حالیت آتیان معلومدار کرے و کشمیر کاز اکن ایران نا ثابق گام مخ تفی نا ستاءِ کرے۔ سیکرٹری خارجہ وزیرخارجہ حسین امیر عبداللہ تون اوڑدہی کرے۔ اوبڑزکو کہولی ہڑتوم آ کنڈآتا ہن و برنا ساڑی آ رفتار ءِ برقرار تخنگ و چندی بشخ آتیٹی تین پہ تینی فائدہ ئی کمکاری ءِ سوگو کننگ آ امنا کریر۔ پارلیمنٹ نا باسک/ چیئرمین پاکستان۔ایران پارلیمانی فرینڈ شپ گروپ احمد امیر آبادی فرحانی تون جتا اوڑدہی ٹی ہڑتوم آفریق آک پارلیمانی ہن و بر ءِ ودفنگ نا اہمیت آ زور شاغا۔ سیکرٹری خارجہ ڈاکٹر اسد مجید خان اکنامک کوآپریشن آرگنائزیشن (ای سی او) نا سیکرٹری جنرل خسرو نوزیری تون ہم اوڑدہی کرے و تنظیم کن پاکستان نا مخ تفی نا درشانی ءِ کرے۔ اوای سی او نا باسک ملک آتا نیام اٹ علاقائی رابطہ و واپاری مون آ دننگ نا اہمیت ءِ ہم تالان کرے۔ تہران اٹی سیکرٹری خارجہ پنی آ ایرانی تھنک ٹینک انسٹی ٹیوٹ آف پیس اینڈ انٹرنیشنل اسٹڈیز نا ایرانی دانشور و اسکالرآتون ہم گپ وتران کرے ہراڑے او ڈیہہ اٹی امن و شونداری نا مون آ دننگ کن پاکستان نا کڑد ءِ مون آتخا۔
