چیئرمین ، ڈپٹی چیئرمین سینیٹ و سینیٹ نا باسک آتا تنخواہ و آسودہی تا بابت بل انا منظوری آن قومی خزانہ غا اسہ پیسہ  سے نا ہم بھاریم تمتنے، محمد صادق سنجرانی

اسلام آباد۔ 19 جون (اے پی پی) چیئرمین سینیٹ محمد صادق سنجرانی پارینے کہ چیئرمین ، ڈپٹی چیئرمین سینیٹ  و سینیٹ نا باسک آتا تنخواہ و آسودہی تا بابت بل انا منظوری آن قومی خزانہ غا اسہ پیسہ سے نا ہم بھاریم تمتنے، بیرہ قومی اسمبلی و سینیٹ نا 1975 نا ایکٹ ءِ جتا جتا کننگانے، چیئرمین و ڈپٹی چیئرمین سینیٹ نا تنخواہ ٹی ودکی کن ہچ ءُ سمری اس گدریفنگ تنے۔ دوشنبے نادے آبڑزکو ایوان نا دیوان اٹی چیئرمین سینیٹ، ڈپٹی چیئرمین سینیٹ و سینیٹ نا باسک آتا تنخواہ و آسودہی تا بابت بل آتا منظوری نا بابت میڈیا ٹی شینک مروک آ خبر آتیا وضاحت کرسا اوپارے کہ دا بابت مسہ بل منظور کننگاسر، قومی اسمبلی و سینیٹ کن 1975 نا اسہ ایکٹ اس ئسک ، داسہ دا ترمیم آتیان اوفتے جتا جتا کننگانے، اودےمیڈیا ٹی سٹی پیش کننگا، دا بل آتا منظوری آن بجٹ اٹ اسہ پیسہ سےنا ہم ودکی مفک، دا تنخواہ و آسودہیک سینیٹ ءِ مہالو آن  ملنگ ءُ، ای تینا دفتراٹ قومی خزانہ غان اسہ پیسہ اس ہم خلتنوٹ۔ اوپارے کہ دا بل آتیٹی چیئرمین  سینیٹ نا دفترنا خڑچہ ءِ 6 ہزار روپئی آن ودفسا 50 ہزار روپئی کننگانے، چیئرمین سینیٹ نا اُرا نا کِرا ءِ دونیم لکھ روپئی مقرر کننگانے،  چیئرمین سینیٹ نا اُرا نا زیب و زینت کن 50 ہزار روپئی تخنگاسس، اوفتے ودفنگانے، میڈیا دا بابت سینیٹ سیکرٹریٹ آن معلومداری ہلنگ کیک ۔