اسلام آباد۔ 19 جون (اے پی پی) بنجائی وزیر ڈٹ بندی، شونداری ، اصلاحات و خصوصی گام گیج پروفیسر احسن اقبال پارینے کہ پاکستان نا زرگزران نا کچ 2035 اسکان 1 ٹریلین ڈالر اسکان سرمننگ نا گمان ءِ ہراڑان ملک دنیا نا بھلا زرگزران جوڑ مریک۔ داخیال آتا درشانی ءِ او دوشنبے نادے آ ’ماسٹر کارڈ فنڈ ڈکیئر اگنائٹ پروجیکٹ‘‘ نا دود آن تران کرسا کرے۔ پروفیسر احسن اقبال پارے کہ ملک انا زرگزران 2035 اسکان دنیا نا اسہ بھلو زرگزران اس جوڑ مننگ نا لائخی تخک۔ اواومیت ظاہر کرے کہ بروک آ پنچ سال اٹی ملکی برآمد آک 100 ارب ڈالر اسکان سرمریرہ، ساڑی ملکی برآمدآک 30 ارب ڈالر ءُ ہراکہ اونا لائخی آن بھاز کم ءُ۔ اوپارے کہ ساڑی حکومت زرگزران نا گچینی کن گونڈ مدتی، نیامی و مریس مدتی ڈٹ بندی آ عمل کننگ ءِ ہراڑکن اقتصادی کونسل اس ٹہیفنگانے۔ احسن اقبال پارے کہ تحریک انصاف نا مسکوہی حکومت نا غلط ڈٹ بندی نا سوب آن ملکی زرگزران خراب مس۔ اوپارے کہ مسلم لیگ ن نا تدوک آ حکومت اٹ جہانی اقتصادی تھنک ٹینکس پاکستانی زرگزران ءِ دنیا نا مون آ 20 بھلا زرگزران تیٹی شمار کریکہ۔ اوپیدوار کرے کہ چائنا پاکستان اکنامک کوریڈور(سی پیک) نا بنداو مسلم لیگ( ن) نا مسکوہی حکومت تخاسس، و داڑکن ملک اٹی بھلو زرکاری اس بسوسس۔
