اسلام آباد۔ 19 جون (اے پی پی) بنجائی وزیر خزانہ سینیٹر اسحاق ڈار پارینے کہ نوکاپ آن زہمی علاقہ غاتیٹی اُراتا تفنگ و بحالی کن 16 ارب 30 کروڑ ڈالر نا گرج ءِ ہرافتیان 11 ارب ڈالر سندھ اٹی خڑچ مریک، نن میثاق جمہوریت آنبار میثاق زرگزران نا ہم کوشست کرین تانکہ اسہ روڈ میپ اس جوڑ مرے ہراڑا عمل کرسا نن زرگزرانی گچینی نا سفر کنڈا کان۔ دوشنبے نادے آ قومی اسمبلی ٹی پیپلزپارٹی نازالبول باسک ڈاکٹر نفیسہ شاہ نا کنڈآن چست کروک ٹک آتا ورندی ءِ ترسا اسحاق ڈار پارے کہ سندھ اتون اوار نوکاپ آن زہمی علاقہ غاتیٹی ریلیف نا مرحلہ ٹی بینظیر انکم سپورٹ پروگرام نا کمک اٹ 80 ارب روپئی بشخنگا وخت اس کہ این ڈی ایم اے تون ریلیف نا ساڑی گڑاتے ہم بشخنگا۔اوپارے کہ بیرہ زہمی علاقہ غاتیٹی اُرا و انفراسٹرکچر نا بحالی کن 16 ارب 30 کروڑ ڈالردرکارمریک، ڈونر کانفرنس اٹی چندی ملک و ادارہ غاتا کنڈآن امداد نا پڑو کننگانے۔ وزیرخزانہ پارے کہ جمعہ نادے آ دابابت مرغن ءُ دیوان اس اڈ ہلک ہراٹی وزیراعلیٰ سندھ و پیپلزپارٹی آن تعلق تخوک آ سینئر وزیرآک بشخ ہلکر، وزیراعظم نا پارت آ ای ہم دا دیوان اٹی ساڑی ئسٹ ہراٹی بھلو حد اسسکان روڈ میپ اس جوڑ کننگانے، دا چار سال انا نیام مدتی پروگرام اس مریک۔ اوپارے کہ نوکاپ آن زہمی علاقہ غاتیٹی اُراتا تفنگ کن ڈٹ بندی آ سجفنگ انگ ءِ، داڑا خلیس نا گرج اف ، دا بابت اینو ولدا دیوان اس بٹنگانن ، داٹی اودے گڈیکو درشم اس تننگک۔
